អ៊ុយក្រែនលើកឡើងពីលក្ខខណ្ឌសម្រាប់ការចរចាបទឈប់បាញ់ជាមួយរុស្ស៊ី

ចែករំលែក៖

កាលពីថ្ងៃទី ២២ ខែតុលា ទីភ្នាក់ងារសារព័ត៌មានក្យូដូ (ជប៉ុន) បានដកស្រង់សេចក្តីថ្លែងការណ៍របស់លោក Oleksiy Danilov លេខាធិការនៃក្រុមប្រឹក្សាការពារជាតិនិងសន្តិសុខអ៊ុយក្រែន ដោយបញ្ជាក់ថា ក្រុងកៀវនឹងមិនចរចាបទឈប់បាញ់ជាមួយទីក្រុងមូស្គូ រហូតដល់រុស្ស៊ី “ប្រគល់ទឹកដីកាន់កាប់នៅអ៊ុយក្រែន” វិញ។
មន្ត្រីសន្តិសុខអ៊ុយក្រែនរូបនេះក៏បានចង្អុលបង្ហាញពីចេតនារបស់ទីក្រុងកៀវក្នុងការបន្តវាយលុកប្រឆាំងនឹងហេដ្ឋារចនាសម្ព័ន្ធយោធាដែលគ្រប់គ្រងដោយរុស្ស៊ី។
លោក Oleksiy Danilov ក៏បានរំពឹងថា “ស្ថានភាពនឹងផ្លាស់ប្តូរជាមូលដ្ឋាន” នៅពេលដែលទីក្រុង Kiev ទទួលបានយន្តហោះចម្បាំង F-16 ពីលោកខាងលិច និងពង្រឹងប្រព័ន្ធការពារដែនអាកាសរបស់ខ្លួន បើទោះបីជាលោកបានសារភាពថាវាពិបាកក្នុងការទស្សន៍ទាយពេលវេលាចាំបាច់សម្រាប់ការវាយប្រហារតបត “ដណ្តើមយកទឹកដីនៃប្រទេសទាំងមូលមកវិញ”ក៏ដោយ។
លេខាធិការនៃក្រុមប្រឹក្សាការពារជាតិ និងសន្តិសុខរបស់អ៊ុយក្រែនក៏បានរំសាយក្តីកង្វល់ដែលថា ការយកចិត្តទុកដាក់និងការគាំទ្ររបស់អន្តរជាតិចំពោះទីក្រុងកៀវនឹងធ្លាក់ចុះ ចំពេលដែលស្ថានការណ៍កាន់តែតានតឹងរវាងអុីស្រាអែលនឹងក្រុមសកម្មប្រយុទ្ធហាម៉ាស់នៅមជ្ឈិមបូព៌ា។
លោក Oleksiy Danilov បានបញ្ជាក់ថា៖ «មិនមានការធ្លាក់ចុះក្នុងទំនាក់ទំនងជាមួយអាមេរិកនិងអឺរ៉ុបទេ។ កិច្ចសហប្រតិបត្តិការនៅតែបន្ត ហើយយើងទទួលបានជំនួយជារៀងរាល់ថ្ងៃ»៕ ដោយ៖ ធីរីណា