សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ ៖ ជនត្រូវចោទប្រុសស្រីចំនួន ០៧នាក់ ត្រូវបានលោក ជា ប៉ោ ចៅក្រមស៊ើបសួរសាលាដំបូងខេត្តក្រចេះ នៅល្ងាចថ្ងៃទី១៥ ខែវិច្ឆិកា ឆ្នាំ២០២៣នេះ សម្រេចចេញដីកាឃុំខ្លួនដាក់ពន្ធនាគារជាបណ្ដោះអាសន្ន ក្រោយចាប់បង្ខាំងមនុស្សខុសច្បាប់ និងអំពើឆបោក នៅស្រុកចិត្របុរី (ព្រោះតែរឿងសំណរខ្មៅប្រែពណ៌ អាចមានតម្លៃប្រមាណជា ១០លានដុល្លារអាមេរិក) ក្នុង១ដុំ។
យោងតាមរបាយការណ៍អាវុធហត្ថខេត្តក្រចេះ បានឱ្យដឹងថា កម្លាំងអាវុធហត្ថ បានទទួលបណ្តឹងតាមទូរស័ព្ទពីឈ្មោះ ប៉ូច គឹមយូ ភេទប្រុស អាយុ៤៥ឆ្នាំ ជនជាតិខ្មែរ រស់នៅភូមិក្បាលពោធិ៍ ឃុំសំបូរ ស្រុកទ្រាំង ខេត្តតាកែវ កាលពីថ្ងៃទី១១ ខែវិច្ឆិកា ឆ្នាំ២០២៣ ម៉ោង១៤៖០០នាទីថា មានមនុស្សមួយក្រុមបានបង្ខាំងខ្លួនទុកនៅចំណុចផ្ទះ១កន្លែង ក្នុងភូមិសំបុក ឃុំសំបុក ស្រុកចិត្របុរី ខេត្តក្រចេះ។
ក្រោយពីទទួលបណ្តឹងកម្លាំងកងរាជអាវុធហត្ថ ក្រោមបញ្ជារបស់លោកឧត្តមសេនីយ៍ សាន្ដ ប៊ុនថាន មេបញ្ជាការអាវុធហត្ថខេត្តក្រចេះ ចុះទៅចំណុចខាងលើ និងបាននាំឈ្មោះខាងលើមកទីបញ្ជាការដ្ឋានអាវុធហត្ថខេត្តដើម្បីសាកសួរ ហើយសាម៉ីខ្លួន បានឆ្លើយបំភ្លឺថាខ្លួនជាតំណាងក្រុមការងារមកត្រួតពិនិត្យមើលលើវត្ថុ សំណរខ្មៅប្រែពណ៌ដែលគេអះអាងថាមាននៅខេត្តក្រចេះ។ ហើយខ្លួនបានទាក់ទងជាមួយ ប៉ា កុសល នៅខេត្តក្រចេះ បន្ទាប់មកឈ្មោះ ប៉ា កុសល បានឱ្យខ្លួនបើករថយន្តតាមរថយន្តម៉ាកលុចស៊ីស៤៧០ ពណ៌ខ្មៅសំដៅទៅភូមិសំបុក ឃុំសំបុក ស្រុកចិត្របុរី ខេត្តក្រចេះ ជាលំនៅដ្ឋានមួយដែលមិនស្គាល់ ខ្លួនបានទៅត្រួតពិនិត្យលើវត្ថុខាងលើ ដោយបានយកក្រចកឆ្កិះលើវត្ថុនោះបណ្តាលឱ្យរបើកខូចខាត ទើបខ្លួនដឹងថាវត្ថុខាងលើជាវត្ថុមិនពិត ខ្លួនបានប្រកែកមិនព្រមយកទើបម្ចាស់របស់ទាំងអស់ខាងលើបានគំរាមឱ្យខ្លួនសង បានចាក់សោរទ្វាររបងដោយមិនឱ្យខ្លួនចេញក្រៅឡើយ។
តាមរបាយការណ៍ដដែល បានបញ្ជាក់ទៀតថា ក្រោយមានការសម្របសម្រួលនីតិវិធីពី លោកព្រះរាជអាជ្ញា កម្លាំងអាវុធហត្ថខេត្តបានធ្វើការឃាត់ខ្លួនជនសង្ស័យជាប់ពាក់ព័ន្ធ ចំនួន០៤នាក់រួមមាន៖
១៖ ឈ្មោះ ស៊ុក សំណាង ភេទប្រុស អាយុ៤២ឆ្នាំ ជនជាតិខ្មែរ មានទីលំនៅភូមិកំពង់ចុះវា ឃុំវិហារលួង ស្រុកពញាឮ ខេត្តកណ្តាល មុខរបរកសិករ។
២៖ ឈ្មោះ ធុន សីហា ភេទប្រុស អាយុ២៨ឆ្នាំ មានទីលំនៅបច្ចុប្បន្នភូមិពង្រ សង្កាត់កំបូល ខណ្ឌកំបូល រាជធានីភ្នំពេញ មុខរបរគ្រូបង្រៀនកូរ៉េតាមអនឡាញ ។
៣៖ ឈ្មោះ ឌី លី ភេទប្រុសអាយុ ៤៥ឆ្នាំ ជនជាតិខ្មែរ ទីលំនៅបច្ចុប្បន្ន ភូមិដំណាក់ធំ៣ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ មុខរបរកសិករ ។
៤៖ ឈ្មោះ ចៅ ណាក់ ភេទប្រុស អាយុ៥១ឆ្នាំ ជនជាតិខ្មែរ មានទីលំនៅបច្ចុបន្នភូមិសំបុក ឃុំសំបុក ស្រុកចិត្តបុរី ខេត្តក្រចេះ។
ដកហូតវត្ថុតាងចាប់យករួមមាន៖ ទូរស័ព្ទចំនួន៦គ្រឿង, នាឡិកាដៃ ចំនួន១គ្រឿង, តាំប៉ុងផ្តិតម្រាមដៃ ចំនួន១, ឯកសារកិច្ចសន្យាទិញ-លក់ សំណរខ្មៅ ចំនួន១ច្បាប់។
លុះដល់ថ្ងៃទី១២ ខែវិច្ឆិកា ឆ្នាំ២០២៣ កម្លាំងអាវុធហត្ថខេត្ត បានសហការជាមួយ កម្លាំងនគរបាលប៉ុស្តិ៍សំបុក តំណាងមេភូមិ ដឹកនាំដោយលោក អង រី ព្រះរាជអាជ្ញារង អយ្យការសាលាដំបូងខេត្តក្រចេះ បានបន្តធ្វើការឆែកឆេរលំនៅដ្ឋានរបស់ឈ្មោះ ខ្វៀង ធីបែរ ភេទស្រី នៅចំណុចខាងលើ បានចាប់យកវត្ថុតាងរួមមាន៖ ទូដែក ពណ៌មាស ចំនួន១គ្រឿង និងបន្តឃាត់ខ្លួនជនសង្ស័យ ចំនួន៣នាក់ទៀតរួមមាន៖
១៖ ឈ្មោះ ចៅ ស្រីនាង ភេទស្រី អាយុ២៦ឆ្នាំជនជាតិខ្មែរ។
២៖ ឈ្មោះ ង្វៀង ដុកធៀក ភេទប្រុស អាយុ៤១ឆ្នាំ ជនជាតិវៀតណាម ។
៣៖ ឈ្មោះ ង្វៀង យ៉ាំងថាន់ ភេទប្រុស អាយុ៥៤ឆ្នាំ ជនជាតិវៀតណាម។
គួរបញ្ជាក់ថា តាមការអះអាងរបស់ដើមបណ្តឹង បានអះអាងថា សំណរខ្មៅប្រែពណ៌ ប្រសិនជារបស់ពិតគឺខ្មៅសុទ្ធការពារផ្លូវងងឹត មានតម្លៃប្រមាណជា ១០លានដុល្លារអាមេរិក) ក្នុង១ដុំ៕
ដោយ៖សហការី
