សារព័ត៌មាន នគរវត្ត តែងតែនាំមុខគេជានិច្ច
លោក Lionel Scaloni គ្រូបង្វឹកដែលជួយក្រុមឈ្នះពាន World Cup របស់ប្រទេសអាហ្សង់ទីន និយាយថា គាត់កំពុងពិចារណាលាលែងពីតំណែង បន្ទាប់ពីបានកាន់តួនាទីនេះអស់រយៈពេល៥ឆ្នាំ។
លោក Scaloni បានធ្វើសេចក្តីប្រកាសដ៏គួរឱ្យភ្ញាក់ផ្អើលបន្ទាប់ពីការប្រកួតជម្រុះ World Cup របស់អាហ្សង់ទីនដោយលទ្ធផល ១–០ លើប្រេស៊ីលក្នុងទីក្រុង Rio de Janeiro កាលពីថ្ងៃពុធ។ គ្រូបង្វឹកវ័យ៤៥ឆ្នាំរូបនេះក៏បានដឹកនាំអាហ្សង់ទីនទៅកាន់ពានរង្វាន់ Copa America ក្នុងឆ្នាំ២០២១ មុនពេលការឈ្នះពាន World Cup របស់ពួកគេនៅប្រទេសកាតាកាលពីឆ្នាំមុន។
លោក Scaloni បាននិយាយថា “អាហ្សង់ទីនត្រូវការគ្រូបង្វឹកដែលមានថាមពលទាំងអស់ដែលអាចធ្វើទៅបាន ហើយអ្នកណាដែលមានសុខភាពល្អ។ខ្ញុំត្រូវការបញ្ឈប់ ហើយចាប់ផ្តើមគិត ខ្ញុំមានរឿងជាច្រើនដែលត្រូវគិតក្នុងអំឡុងពេលនេះ។ វាមិនមែនជាពាក្យលា ឬអ្វីនោះទេ ប៉ុន្តែខ្ញុំត្រូវតែគិត ពីព្រោះមានទំនួលខុសត្រូវខ្ពស់ណាស់ ហើយមានភាពស្មុគស្មាញក្នុងការបន្តទៅមុខ និងស្មុគស្មាញក្នុងការបន្តការឈ្នះ។ អ្នកទាំងនេះកំពុងធ្វើឱ្យមានការលំបាក ដូច្នេះខ្ញុំត្រូវគិតអំពីវាមួយរយៈសិន ខ្ញុំនឹងនិយាយជាមួយប្រធាន FA និងកីឡាករបន្ទាប់ទៀត“។
លោក Scaloni បានស្នងតំណែងជំនួសលោក Jorge Sampaoli ជាគ្រូបង្វឹកក្រុមជម្រើសជាតិអាហ្សង់ទីនកាលពីខែសីហា ឆ្នាំ២០១៨ បន្ទាប់ពីដឹកនាំក្រុមអាយុក្រោម២០ឆ្នាំរយៈពេលខ្លី។
ការឈ្នះពាន Copa America កាលពីឆ្នាំ២០២១ របស់អាហ្សង់ទីនគឺជាពានធំដំបូងបង្អស់របស់ប្រទេសនេះសម្រាប់រយៈពេល២៨ឆ្នាំ ហើយមានន័យថា ពួកគេមានលក្ខណៈសម្បត្តិគ្រប់គ្រាន់សម្រាប់ការប្រកួត Finalissima ទល់នឹងម្ចាស់ជើងឯកអឺរ៉ុបអ៊ីតាលីក្នុងខែមិថុនា ឆ្នាំ២០២២ ដែលពួកគេបានឈ្នះ ៣–០នៅ Wembley។ ការឈ្នះពាន World Cup របស់អាហ្សង់ទីននៅប្រទេសកាតាក្រោយមកនៅឆ្នាំនោះគឺជាពានរង្វាន់ពិភពលោកជាលើកទី៣របស់ខ្លួន និងជាលើកដំបូងចាប់តាំងពីឆ្នាំ១៩៨៦។
ខ្សែការពារអាហ្សង់ទីន លេងនៅក្លិប Tottenham កីឡាករ Cristian Romero បាននិយាយថា “យើងប្រាកដហើយសង្ឃឹមថា លោក Scaloni នឹងបន្ត។ ចាំមើលឥឡូវនេះគាត់នឹងមានពេលគិត គាត់មិនបាននិយាយអ្វីនៅក្នុងបន្ទប់ស្លៀកពាក់អំពីការលាលែងនោះទេ យើងនឹងព្យាយាមបញ្ចុះបញ្ចូលគាត់”។
ការទទួលជ័យជម្នះលើប្រេស៊ីលកាលពីថ្ងៃពុធ ទី២២ វិច្ឆិកានេះ គឺជាជ័យជម្នះក្រៅដីលើកដំបូងមិនធ្លាប់មានរបស់អាហ្សង់ទីនលើគូប្រជែងរបស់ខ្លួនក្នុងវគ្គជម្រុះ World Cup ហើយបានធ្វើឱ្យពួកគេនាំមុខ២ពិន្ទុនៅលើកំពូលតារាង។ការប្រកួតនៅកីឡដ្ឋាន Maracana ទីក្រុង Rio ត្រូវបានពន្យារពេល៣០នាទី បន្ទាប់ពីបញ្ហាហ្វូងមនុស្សផ្ទុះហិង្សាដាក់គ្នាអំឡុងពេលគោរពភ្លេងជាតិ៕
ដោយ៖ ភារៈ(រូបភាព ៖ BBC Sport)
