សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ រដ្ឋបាលខេត្តព្រះសីហនុ នៅព្រឹកថ្ងៃទី២៥ ខែវិច្ឆិកា ឆ្នាំ២០២៣នេះ បានឱ្យដឹងថា អ្នកគ្រប់គ្រងនាវាទេសចរណ៍ បានសម្តែងការដឹងគុណ និងកោតសរសើរ រដ្ឋបាលខេត្តព្រះសីហនុ ចំពោះការយកចិត្តទុកដាក់ពីសុវត្ថិភាពរបស់ភ្ញៀវទេសចរណ៍។
រដ្ឋបាលខេត្តព្រះសីហនុ បានឱ្យដឹងទៀតថា យោងតាមប្រសាសន៍ លោក Chaiyapruk Phum Muang នាយកគ្រប់គ្រងក្រុមហ៊ុន Angkor T.K Travel & Tours និងជាទីប្រឹក្សាក្រសួងទេសចរណ៍ ទទួលបន្ទុករៀបចំនាវាទេសចរណ៍ បានធ្វើការចែករំលែក ពី Feedback(មតិកែលម្អ)ដែលយើងបានទទួលពីនាវាទេសចរណ៍ដែលចូលសំចតនៅខេត្តព្រះសីហនុក្នុងខែនេះ។
នាវាទេសចរណ៍នីមួយៗបានសម្តែងការដឹងគុណ និងកោតសរសើរ រដ្ឋបាលខេត្តព្រះសីហនុ ចំពោះការយកចិត្តទុកដាក់ពីសុវត្ថិភាពរបស់ភ្ញៀវទេសចរណ៍។ អ្នកដំណើរមានអារម្មណ៍ថាមានសុវត្ថិភាព និងត្រូវបានថែរក្សាយ៉ាងល្អ ដែលបានបង្ហាញថាក្រុងព្រះសីហនុស្ថិតក្នុងពន្លឺវិជ្ជមាន។ ពួកគាត់សូមថ្លែងអំណរគុណយ៉ាងជ្រាលជ្រៅចំពោះការគាំទ្ររបស់រដ្ឋបាលខេត្ត ហើយនិងធ្វើការងារជាមួយគ្នានាពេលបន្តទៀត។
បន្ថែមពីនេះ រដ្ឋបាលខេត្ត បានគូសបញ្ជាក់ថា ជាការកត់សម្គាល់ថា នៅរយៈពេលចុងក្រោយនេះ នាវាទេសចរណ៍ជាច្រើនគ្រឿង បានចូលចតនៅក្នុងកំពង់ផែអន្តរជាតិខេត្តព្រះសីហនុ និងបានដឹកជញ្ជូនអ្នកដំណើររាប់ពាន់នាក់ចូលទេសចរណ៍ក្នុងប្រទេសកម្ពុជា ដែលជាសញ្ញាល្អនៃវិស័យទេសចរណ៍របស់កម្ពុជាក្រោយវិបត្តិជំងឺកូវីដ-១៩៕
ដោយ៖ សហការី
