សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ ស្នងការដ្ឋាននគរបាលខេត្តពោធិ៍សាត់ បានឱ្យដឹងនៅព្រឹកថ្ងៃទី១៤ ខែធ្នូ ឆ្នាំ២០២៣នេះថា៖ មុខសញ្ញាជួញដូរគ្រឿងញៀនយ៉ាងសកម្មម្នាក់ នៅស្រុកវាលវែង ត្រូវកម្លាំងជំនាញប្រឆាំងគ្រឿងញៀន នៃអធិការដ្ឋាននគរបាលស្រុកវាលវែង បានបេីកប្រតិបត្តិការចុះបង្រ្កាប និងឃាត់ខ្លួនពាក់ព័ន្ធករណីរក្សាទុក ជួញដូរ និងប្រើប្រាស់សារធាតុញៀន។
ការឃាត់ខ្លួនជនសង្ស័យខាងលេីនេះ បានធ្វេីឡេីងកាលពីរសៀលថ្ងៃទី១៣ ខែធ្នូម្សិលមិញនេះ នៅចំណុចលើចិញ្ចើមផ្លូវជាតិលេខ៥៥ ស្ថិតនៅក្នុងភូមិរវៀង ឃុំសំរោង ស្រុកភ្នំក្រវាញ ខេត្តពោធិ៍សាត់។
លោកវរសេនីយ៍ទោ ប៊ូ ង៉ែត អធិការរង នៃអធិការដ្ឋាននគរបាលស្រុកវាលវែង បានបញ្ជាក់ឲ្យដឹងថា ៖ ដោយអនុវត្តន៍យ៉ាងខ្ជាប់ខ្ជួន នូវប្រសាសន៍ចង្អុលរបស់លោកឧត្តមសេនីយ៍ទោ ស ថេង ស្នងការនគរបាលខេត្ត និងទទួលព័ត៌មានច្បាស់ការ អំពីទីតាំងរបស់មុខសញ្ញាសកម្មលើករណីខាងលើ កម្លាំងជំនាញនគរបាលប្រឆាំងគ្រឿងញៀន បានចេញប្រតិបត្តិបង្ក្រាបឃាត់ខ្លួនជនសង្ស័យជាមុខសញ្ញាសកម្ម ឈ្មោះ អ៊ុត តាំងលី ភេទប្រុស អាយុ៤៣ឆ្នាំ មុខរបរមិនពិតប្រាកដ ស្នាក់នៅភូមិរវៀង ឃុំសំរោង ស្រុកភ្នំក្រវាញ ខេត្តពោធិ៍សាត់។ ក្នុងពេលបង្រ្កាបជនសង្ស័យខាងលើបានព្យាយាម តដៃជាមួយសមត្ថកិច្ចហើយបានរត់គេចខ្លួន ក៏បណ្តាលឲ្យត្រូវវត្ថុមុតស្រួចធ្វើឲ្យរងរបួសជើងខាងឆ្វេង និងខ្លួនប្រាណ ហើយភ្លាមនោះជនសង្ស័យបានស្រែកហៅបក្ខពួកដើម្បីឲ្យមកជួយរំដោះរូបខ្លួន ខណៈនោះស្រាប់តែមានបក្ខពួករបស់ជនសង្ស័យមួយក្រុម ប្រដាប់ដោយកាំបិត និងដំបងបានព្យាយាមរំដោះជនសង្ស័យពីសមត្ថកិច្ចក៏បណ្តាលឲ្យសមត្ថកិច្ចរបួស តែដោយកម្លាំងជំនួយមកទាន់ពេលវេលាធ្វើឲ្យក្រុមបក្ខពួកជនសង្ស័យរត់គេចខ្លួនចូលទៅក្នុងព្រៃបាត់អស់។
លោកអធិការរង បានបន្តថា ៖ ដោយឆែកឆេរក្នុងខ្លួនជនសង្ស័យ កម្លាំងជំនាញបានរកឃើញ ម្សៅក្រាមសថ្លាសង្ស័យសារធាតុញៀនចំនួន០១កញ្ចប់តូច ទម្ងន់សាច់ថ្នាំសុទ្ធ ០,៩២ក្រាម, សំបកកូនថង់ផ្លាស្ទិចសម្រាប់ច្រកថ្នាំញៀនមួយចំនួន និងទូរស័ព្ទដៃ ពណ៌ស ចំនួន ០១គ្រឿង។
បច្ចុប្បន្នជនសង្ស័យ ជាមុខសញ្ញាសកម្មក្នុងការជួញដូរ ចែកចាយគ្រឿងញៀន និងធ្វើចរាចរណ៍គ្រឿងញៀនបង្កឲ្យមានភាពអនាធិបតេយ្យក្នុងមូលដ្ឋានស្រុកវាលវែង រួមទាំងវត្ថុតាង ត្រូវបាននាំមកកាន់អធិការដ្ឋាននគរបាលស្រុកវាលវែង ដើម្បីអនុវត្តតាមនីតិវិធី ព្រមទាំងបន្តធ្វើការស៊ើបអង្កេត និងស្រាវជ្រាវរកបក្ខពួកជនសង្ស័យយកចាត់ការតាមច្បាប់៕
ដោយ៖ សហការី
