សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន៖ យោងតាមរបាយការណ៍របស់សមត្ថកិច្ចជំនាញចរាចរណ៍នៃស្នងការដ្ឋានខេត្តបានឱ្យដឹងថា÷ នៅវេលាម៉ោង១៨និង២៣នាទីថ្ងៃទី១៨ ខែធ្នូ ឆ្នាំ ២០២៣ មានករណីគ្រោះថ្នាក់ចរាចរណ៍ ដោយរថយន្ត១គ្រឿងមិនស្គាល់អត្តសញ្ញាណបានបើកបុកអ្នកថ្មើរជើងម្នាក់ដែលកំពុងធ្វើដំណើរលើចិញ្ចើមផ្លូវ ក្នុងទិសដៅស្របគ្នាពីលិចទៅកើត ស្ថិតនៅលេីផ្លូវជាតិលេខ៥៧ ចន្លោះគីឡូម៉ែត្រលេខ 71 -72 ក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិនបណ្ដាលឱ្យបុរសម្នាក់រងរបួសធ្ងន់ (ផុងលលាដ៍ក្បាលផ្នែកថ្ងាសខាងឆ្វេង)។
សមត្តកិច្ចនគរបាលចរាចរណ៍ផ្លូវគោកនៃស្នងការដ្ឋានខេត្តបានបន្តថា÷ អ្នកបើកបររថយន្តបើកបុករួចគេចខ្លួនបាត់នោះមិនស្គាល់ឈ្មោះនិងមិនស្គាល់អត្តសញ្ញាណរថយន្តនោះទេ បានរត់គេចពីកន្លែងកើតហេតុបាត់ស្រមោលទៅ។
ចំណែកអ្នកដើរឈ្មោះ ស៊ុយ វី ភេទប្រុស អាយុ២៧ឆ្នាំ មុខរបរកម្មករ រស់នៅភូមិកូនភ្នំ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន( របួសធ្ងន់ )។
នគរបាលជំនាញបានបន្តទៀតថា÷ មូលហេតុដែលបណ្តាលឱ្យមានគ្រោះថ្នាក់ចរាចរណ៍នេះគឺមកពីកត្តាមនុស្សបើកបររថយន្តខ្វះការប្រុងប្រយ័ត្ន បុកអ្នកថ្មើរជើងនៅចិញ្ចើមផ្លូវ។
បច្ចុប្បន្នអ្នករងគ្រោះត្រូវបានដឹកទៅព្យាបាលនៅមន្ទីរពេទ្យបង្អែកខេត្តប៉ៃលិន៕
ដោយ៖ ស សារ៉េត
