សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មជ្ឈដ្ឋានទូទៅគាំទ្រថ្នាក់ដឹកនាំក្រសួងមហាផ្ទៃ អគ្គស្នងការនគរបាលជាតិ បានវះកាត់សាច់ស្អុយចោល ខណៈប្រកាសក្តែងៗហើយនៅមិនស្តាប់ទៀត…ដូច្នេះមន្ត្រីនគរបាលជាតិចំនួន១០នាក់ទៀត ត្រូវបានរដ្ឋមន្ត្រីក្រសួងមហាផ្ទៃបណ្តេញចេញពីក្របខ័ណ្ឌ ក្រោយធ្វើតេស្តរកឃើញមានផ្ទុកសារធាតុញៀននៅក្នុងខ្លួន ។ នេះបើតាមការបញ្ជាក់របស់អ្នកនាំពាក្យរងក្រសួងមហាផ្ទៃ លោកបណ្ឌិត ទូច សុឃៈ បានឲ្យដឹងនៅថ្ងៃទី៥ ខែមករា ឆ្នាំ២០២៤ នេះ។
សូមបញ្ជាក់ថា ៖ មន្ត្រីនគរបាលទាំង១០នាក់នោះ គឺសុទ្ធសឹងតែជាមន្ត្រី ហើយមានតួនាទីខ្ពស់បំផុតត្រឹមអនុសេនីយ៍ឯក គឺស័ក្តិ៣» ។ ចំពោះការធ្វើតេស្តរកឃើញកម្លាំងនគរបាលមានផ្ទុកសារធាតុញៀននេះ ត្រូវបានអ្នកនាំពាក្យរងក្រសួងមហាផ្ទៃបានលើកឡើងថា ៖ នៅនាយកដ្ឋានព្រំដែនទឹករកឃើញ១នាក់ ស្នងការដ្ឋាននគរបាលរាជធានីភ្នំពេញ២នាក់ ស្នងការដ្ឋាននគរបាលខេត្តត្បូងឃ្មុំ៣នាក់ នាយកដ្ឋានសន្តិសុខឯកជន១នាក់ ស្នងការដ្ឋាននគរបាលខេត្តកំពង់ស្ពឺ១នាក់ ស្នងការដ្ឋាននគរបាលខេត្តស្ទឹងត្រែង២នាក់ ។
ជាមួយគ្នានោះដែរ លោកបណ្ឌិតបានលើកឡើងថា ៖ ក្រៅពីអង្គភាពដែលររៀបរាប់ខាងលើ ដែលស្ថិតក្នុងចំណុះឲ្យអគ្គស្នងការដ្ឋាននគរបាលជាតិ គឺមិនមានមន្ត្រីនគរបាលរូបណា ត្រូវបានរកឃើញថាមានសារធាតុញៀននោះទេ ។
សូមរម្លឹកថា៖ រដ្ឋមន្ត្រីក្រសួងមហាផ្ទៃចេញប្រកាសសម្រេចអនុវត្តវិន័យចំពោះមន្ត្រីនគរបាលជាតិចំនួន ១២រូប នៃស្នងការដ្ឋាននគរបាលរាជធានីភ្នំពេញ ក្រោមរូបភាពដកហូតមុខតំណែង ឋានន្តរស័ក្តិ និងបណ្ដេញចេញពីក្របខ័ណ្ឌមន្ត្រីនគរបាលជាតិ ៕
ដោយ ៖ សិលា
