សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ កីឡាករប្រដាល់ដ៏ល្បីឈ្មោះបោះសំឡេង លោក ព្រំ សំណាង បានបើកបររថយន្តបុករះម៉ូតូកង់បី៣គ្រឿង និងម៉ូតូមួយគ្រឿងទៀតបណ្តាលឱ្យមនុស្សប្រុសស្រី៥នាក់រងរបួសធ្ងន់និងស្រាល។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង ៣និង៣៥នាទីទៀបភ្លឺឈានចូលថ្ងៃទី០៧ ខែមករា ឆ្នាំ២០២៤ ស្ថិតនៅតាមបណ្តោយផ្លូវវេងស្រេង ខាងមុខប៊ីតណាយក្លិប សង្កាត់ចោមចៅទី១ ខណ្ឌពោធិ៍សែនជ័យ ។
ប្រភពព័ត៌មាននៅកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញកីឡាករព្រំ សំណាង បើកបររថយន្តមួយគ្រឿង ម៉ាកម៉ាសស្តា ពណ៌ក្រហម ពាក់ស្លាកលេខភ្នំពេញ2BU-4078 ធ្វើដំណើរតាមបណ្តោយផ្លូវវេងស្រេងក្នុងទិសដៅពីកើតទៅលិចក្នុងល្បឿនលឿន ខណៈបើកមកដល់ចំណុចកើតហេតុស្រាប់តែរេចង្កូតទៅបុករះម៉ូតូកង់បីចំនួន៣គ្រឿង និងម៉ូតូមួយគ្រឿងទៀត បណ្តាលឱ្យមនុស្សប្រុសស្រីឈរលេងនៅមុខក្លិបរងរបួសធ្ងន់ស្រាលចំនួន៥នាក់ បញ្ជូនទៅមន្ទីរពេទ្យ ចំណែកអ្នកបើករថយន្តបង្កហេតុជាកីឡាករព្រំសំណាង ត្រូវសមត្ថកិច្ចឃាត់នៅកន្លែងកើតហេតុ។
បន្ទាប់ពីកើតហេតុសមត្ថកិច្ចមូលដ្ឋាន បានចុះទៅដល់កន្លែងកើតហេតុធ្វើការវាស់វែងយករថយន្តនិងម៉ូតូកង់បី៣គ្រឿង និងម៉ូតូមួយគ្រឿងទៀតដាក់អែបខាងឱ្យភាគីទាំងអស់ដោះស្រាយគ្នាមួយជំហានសិន៕
ដោយ៖ ជ្រោយពេជ្រ
