សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យោងតាមរយៈផេកហ្វេសប៊ុកផ្លូវការរបស់លោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកស៊ីម៉ាក់ នាថ្ងៃទី១០ ខែមករា ឆ្នាំ២០២៤នេះ បានសំណូមពរដល់រាជរដ្ឋាភិបាលធ្វើច្បាប់ហាមឃាត់ការបរិភោគសាច់សុនខ(ឆ្កែ) នៅកម្ពុជា និងស្នើឲ្យមានការដាក់ទោសដល់ជនល្មើសទៅតាមច្បាប់ជាធរមានផងដែរ។
លោកអគ្គនាយកស៉ីម៉ាក់រូបនេះ បានលើកឡើងថា សូមអបអរសាទរចំពោះប្រទេសកូរ៉េខាងត្បូងបានសម្រេចដាក់ច្បាប់ហាមឃាត់ ការបរិភោគសាច់សុនខកាលពីថ្ងៃទី០៩ ខែមករា ឆ្នាំ២០២៤នេះ!! ច្បាប់ហាមឃាត់បរិភោគសាច់សុនខនេះ អាចធ្វើការផាកពិន័យជនល្មើសជាង២២,០០០ដុល្លារ ឬជាប់គុក៣ឆ្នាំ។
លោក ហេង រតនា បានបន្តថា នៅកូរ៉េខាងត្បូងមានអាជីវកម្មចិញ្ចឹមសុនខលក់សាច់ជាង ៣៥០០កន្លែង និងលក់សាច់សុនខចំនួនជាង ៣០០០កន្លែង មានសុនខចំនួនប្រមាណជាង ១.៥លានក្បាល។ ប្រពៃណីកូរ៉េការបរិភោគសាច់សុនខបានចាក់ឫសជ្រៅតាំងពីសម័យបុរាណមកម៉្លេះ តែកូរ៉េខាងត្បូងនៅតែកែប្រែបាន។
ក្រឡេកមកមើលកម្ពុជាយើងវិញ អគ្គនាយកស៊ីម៉ាក់ បានលើកឡើងថា មានប្រពៃណីទំនៀមទម្លាប់ថ្លៃថ្លូ មិនបរិភោគសាច់សុនខនេះតាំងពីបុរាណកាលមកម៉េះ ប៉ុន្តែបច្ចុប្បន្ននេះ មានអ្នកបរិភោគសាច់សុនខកាន់តែច្រើនឡើងៗ ជាពិសេសក្នុងចំណោមយុវជននេះតែម្តង។
យោងតាមឯកសារស្រាវជ្រាវបានឱ្យដឹងថា មានការសម្លាប់សុនខយកសាច់មានប្រមាណ២-៣លានក្បាលក្នុងមួយឆ្នាំៗ ហើយកន្លែងសុនខឃាត សុទ្ធតែគ្មានច្បាប់អនុញ្ញាតឡើយដូចនេះការបរិភោគសាច់សុនខអាចប្រឈមនឹងគ្រោះសុខភាពសាធារណៈផងដែរ តែអ្វីកាន់គ្រោះថ្នាក់ថែមទៀតនោះគឺប្រពៃណីទំនៀមទម្លាប់ដ៏ផូរផង់របស់ដូនតាខ្មែរត្រូវបានបំផ្លាញ ធ្វើឱ្យប៉ះពាល់ធ្ងន់ធ្ងរដល់សីលធម៌សង្គម និងភ្លៀវទេសចរអន្តរជាតិមួយចំនួនមិនចង់មកទស្សនាកម្ពុជា ដោយសារទិដ្ឋភាពអវិជ្ជមាន នៃការធ្វើអាជីវកម្មសម្លាប់សត្វសុនខធ្វើជាអាហារនេះ!!។ នេះបើតាមការលើកឡើងរបស់ឯកឧត្តម ហេង រតនា ដដែល។
លោកប្រតិភូ ក៏បានគូសបញ្ជាក់ថា«ខ្ញុំយល់ថាខ្មែរអាចធ្វើបាន នៅចំពោះមុខកម្ពុជាក៏មានច្បាប់គ្រប់គ្រងសត្វ និងចំណីអាហារមួយចំនួនដែលក្រសួងស្ថាប័នពាក់ព័ន្ធអាចយកមកអនុវត្តន៍ហាមឃាត់បាន និងទន្ទឹងនឹងនេះ សូមសំណូមពរចលនាកសាងច្បាប់មួយនៅព្រះរាជាណាចក្រនេះ ដើម្បីហាមឃាត់ការបរិភោគសាច់សុនខ និងដាក់ទោសចំពោះជនល្មើសតាមច្បាប់តែម្តង!»។
គួររម្លឹកដែរថា អាជ្ញាធរខេត្តសៀមរាប កាលពីឆ្នាំ២០២០កន្លងទៅនេះ បានប្រកាសហាមឃាត់ការធ្វើអាជីវកម្មទិញលក់ និងសម្លាប់សត្វឆ្កែផងដែរ ដើម្បីទប់ស្កាត់ការឆ្លងរាលដាលជំងឺឆ្កែឆ្កួត និងជំងឺផ្សេងៗទៀតដែលធ្វើឱ្យប៉ះពាល់ដល់សុខភាពសាធារណៈ។ ការហាមនេះរដ្ឋបាលខេត្តក៏បានលើកឡើងផងដែរថា«តាំងពីបុរាណកាលរៀងមក សត្វសុនខ ឬសត្វឆ្កែ ត្រូវបានប្រជាជនទូទាំងពិភពលោក ជាពិសេសប្រជាជនខ្មែរយើង បានចាត់ទុកជាសត្វចិញ្ចឹមដ៏ស្មោះត្រង់របស់មនុស្ស ហើយសត្វឆ្កែមានគុណតម្លៃណាស់សម្រាប់ការពារផ្ទះ ចម្ការ ហ្វូងសត្វ ជួយក្នុងវិស័យយោធា(ការរកមីន និងគ្រាប់មិនទាន់ផ្ទុះ)បានល្អទៀតផង៕
ដោយ៖ តារា
