ឧត្តមសេនីយ៍ឯក ជា ពៅ៖ អគ្គស្នងការដ្ឋាននគរបាលជាតិ បង្កើតប្រព័ន្ធដាក់ពាក្យប្តឹងតាមអនឡាញ លើករណីឆបោកតាមប្រព័ន្ធបច្ចេកវិទ្យា

ចែករំលែក៖

ភ្នំពេញ៖ បេីតាមការបញ្ជាក់ពីលោកឧត្តមសេនីយ៍ឯក ជា ពៅ អគ្គស្នងការរងនគរបាលជាតិ បានថ្លែងឱ្យដឹងនៅថ្ងៃទី២៥ ខែមករា ឆ្នាំ២០២៤នេះថា៖ អគ្គស្នងការដ្ឋាននគរបាលជាតិ កំពុងដំណើរការលើប្រព័ន្ធទទួល និងដាក់ពាក្យបណ្តឹងតាមអនឡាញលើករណីឆបោកតាមប្រព័ន្ធបច្ចេកវិទ្យា។

លោកឧត្តមសេនីយ៍ឯក ជា ពៅ បានថ្លែងបន្តថា ជាក់ស្ដែងយោងតាមសេចក្តីសម្រេចរបស់ក្រសួងមហាផ្ទៃ កាលពីចុងខែធ្នូ ឆ្នាំ២០២៣កន្លងទៅនេះ ដែលរៀបចំឱ្យបង្កើតការទទួលពាក្យបណ្តឹងឆបោកតាមប្រព័ន្ធបច្ចេកវិទ្យា ដោយប្រែក្លាយពីប្រព័ន្ធពាក់កណ្តាលស្វ័យប្រវត្តិមកជាប្រព័ន្ធស្វ័យប្រវត្តិទាំងស្រុង ដើម្បីឱ្យស្របតាមយុទ្ធសាស្រ្តបញ្ចកោណដំណាក់កាលទី១។ អគ្គស្នងការរងរូបនេះ បន្ថែមថា ការបង្កើតឱ្យមានការទទួលពាក្យបណ្តឹងតាមប្រព័ន្ធអនឡាញនេះ គឺប្រជាពលរដ្ឋគ្រប់ទីកន្លែងមិនថាក្នុងប្រទេស ឬក្រៅប្រទេសអាចដាក់ពាក្យបណ្តឹងបានឱ្យតែករណីទាំងនោះជាបទល្មើសកើតឡើងនៅកម្ពុជា។

លោកឧត្តមសេនីយ៍ឯក ជា ពៅ បានគូសបញ្ជាក់ថា គោលដៅនៃការទទួលពាក្យបណ្តឹងតាមប្រព័ន្ធអនឡាញធ្វើឡើងស្របតាមការវិវឌ្ឍន៍បច្ចេកវិទ្យា ដើម្បីសម្រួលដល់ការជួយសង្គ្រោះប្រជាពលរដ្ឋ ហើយមានល្បឿនលឿនដល់ការស្រាវជ្រាវ និងផ្តល់ទំនុកចិត្តជូនប្រជាពលរដ្ឋ ក៏ដូចជាជនរងគ្រោះ។

លោកអគ្គស្នងការរង បានអះអាងថា ដើម្បីផ្តល់ប្រសិទ្ធភាពលើការងារខាងលើ ការទទួលពាក្យបណ្តឹងលើអនឡាញនេះត្រូវបានដាក់ចេញនូវបទបញ្ជា និងគោលការណ៍ដល់មន្រ្តីទទួលបន្ទុកយ៉ាងច្បាស់លាស់ ដោយគ្រប់ពេលវេលាដែលមានប្រជាពលរដ្ឋជួបប្រទះបញ្ហាប្រឈមដោយសារបទល្មើសឆបោកនឹងមានមន្រ្តីទទួលហើយចាត់វិធានការទៅតាមនីតិវិធីជូនប្រជាពលរដ្ឋ។

បន្ថែមពីនេះ លោកអគ្គស្នងការរងរូបនេះ បានសង្កត់ធ្ងន់ថា បន្ទាប់ពីបង្កើតការទទួលពាក្យបណ្តឹងតាមអនឡាញ អគ្គស្នងការដ្ឋាននគរបាលជាតិ បានគិតគូរពីផែនការបន្ទាប់លើការប្រឆាំងបទល្មើសឆបោកតាមប្រព័ន្ធបច្ចេកវិទ្យាឲ្យស្របទៅតាមសម័យកាល ដោយជំហានបន្ទាប់នឹងរៀបចំឲ្យមានជាភាសាបរទេស គឺភាសាចិន និងភាសាអង់គ្លេសនាពេលឆាប់ៗខាងមុខ។ លោកឧត្តមសេនីយ៍ឯក បន្ថែមថា ការរៀបចំឲ្យមានប្រសិទ្ធភាពលើការងារប្រឆាំងនឹងបទល្មើសឆបោកតាមប្រព័ន្ធបច្ចេកវិទ្យា នឹងបន្តឥតឈប់ឈរប្រសិនសម័យកាលវិវឌ្ឍន៍របស់បច្ចេកវិទ្យាកាន់តែជឿនលឿន ដោយអគ្គស្នងការដ្ឋាននគរបាលបានកំណត់ពង្រឹងថែមទៀតលើធនធានមនុស្ស បច្ចេកវិទ្យា និងសុវត្ថិភាព៕