សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តបែនដឹកដីមួយគ្រឿង បានបេីកគេចពីរថយន្តមួយគ្រឿងទៀតធ្វើឱ្យបួងចង្កូតរហូតដល់ក្រឡាប់ផ្ងារជើងចាក់ដីពេញផ្លូវ តែសំណាងល្អមិនបណ្ដាលឱ្យមានអ្នកណារងរបួសនោះទេ។ហេតុការណ៍នេះបង្កការភ្ញាក់ផ្អេីលកាលពីវេលាម៉ោង៣និង១៥នាទីរសៀល ថ្ងៃទី២៧ ខែមករា ឆ្នាំ២០២៤ នៅតាមបណ្ដោយផ្លូវជាតិលេខ២ ភូមិក្រាំងស្វាយសង្កាត់ព្រែកកំពឹស ខណ្ឌដង្កោ។
បេីតាមប្រភពព័ត៌មានបានប្រាប់ឱ្យដឹងថា មុខពេលកេីតហេតុ គេឃេីញបុរសម្នាក់បានបេីករថយន្តម៉ាក តូយ៉ូតា ព្រូសមួយគ្រឿងតាមផ្លូវជាតិលេខ២ ក្នុងទិសដៅពីកេីតទៅលិច ពេលមកដល់ចំណុចកេីតហេតុក៏បានបត់ឆ្វេង ស្របពេលនោះក៏មានបុរសម្នាក់បានបេីករថយន្តបែនដឹកដីមកពីក្រោយយ៉ាងលឿនបានបួងចង្កូតគេចខ្លាំងពេកព្រោះតែខ្លាចបុករថយន្តព្រូសទេីបរថយន្តដឹកដីក្រឡាប់ផ្ងារជេីងចាក់ដីរាយប៉ាយពេញផ្លូវ តែសំណាងល្អមិនមានអ្នកណាម្នាក់រងរបួសក្នុងករណីនោះទេ តែអ្នកបេីកបររថយន្តបង្កបានរត់គេចខ្លួនបាត់ស្រមោល។
ក្រោយពេលកេីតហេតុ សមត្ថកិច្ចមូលដ្ឋានបានចុះមកដល់និងសហការជាមួយសមត្ថកិច្ចជំនាញចរាចរណ៍ខណ្ឌដង្កោធ្វេីការពិនិត្យកន្លែងកេីតហេតុ ។ បន្ទាប់ពីពិនិត្យជាក់ស្ដែងឃេីញថារថយន្តខាងលេីមិនប៉ះពាលដល់សម្បត្តិរដ្ឋនិងមិនបង្កគ្រោះថ្នាក់ដល់អ្នកណានោះ ទេីបសមត្ថកិច្ចឱ្យខាងតំណាងរថយន្តបង្កហៅរថយន្តស្ទូចមកស្ទូចរថយន្តចេញ ព្រមទាំងកេីបនិងបាញ់ទឹកលាងសម្អាតផ្លូវឱ្យស្អាតដេីម្បីឲ្យបងប្អូនប្រពលរដ្ឋធ្វេីដំណេីរល្អប្រសេីរឡើងវិញ ៕
ដោយ៖ ភារ៉ា ដង្កោ
