សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ សមត្ថកិច្ចនគរបាលបានធ្វើការឃាត់ខ្លួនជនសង្ស័យ២នាក់យកមកសាកសួរ បន្ទាប់ពីបានប្រើហិង្សាព្រួតគ្នាវាយបណ្ដាលអោយបុរសម្នាក់រងរបួសធ្ងន់សន្លប់ស្ដូកស្ដឹងគ្រាន់តែមានទំនាស់ពាក្យសម្តីនិងឈ្លោះប្រកែកគ្នានៅស្រុករំដួល។
ហេតុការណ៍នេះបានកើតឡើងនៅវេលាម៉ោង៥និង៣០នាទីល្ងាច ថ្ងៃទី៣ ខែមីនាឆ្នាំ២០២៤ ស្ថិតក្នុងភូមិត្រពាំងថ្កូវ ឃុំពងទឹក ស្រុករំដួល ខេត្តស្វាយរៀង។
យោងតាមសមត្ថកិច្ចនគរបាលស្រុកបានអោយដឹងថា ជនសង្ស័យមានឈ្មោះ ភឿង សុភ័ក្រ អាយុ៣៦ឆ្នាំ មុខរបរកសិករ និងឈ្មោះវង់ អំ ភេទប្រុស អាយុ២៤ឆ្នាំ មុខរបរកសិករ រស់នៅភូមិត្រពាំងថ្កូវ ឃុំពងទឹក ស្រុករំដួល ខេត្តស្វាយរៀង។
ចំណែកជនរងគ្រោះមានឈ្មោះ យ៉េង រតនា ភេទប្រុស អាយុ៣៦ឆ្នាំ មុខរបរកសិករ រស់នៅភូមិត្រពាំងថ្កូវ ឃុំពងទឹកស្រុករំដួល ខេត្តស្វាយរៀង ។
ប្រភពបន្តថា មុនកើតហេតុគេឃើញជនរងគ្រោះនិងជនសង្ស័យទាំង២នាក់បាននិយាយគ្នា រហូតដល់ឈ្លោះប្រកែកគ្នាមាត់ធំមាត់តូចឈានទៅដល់ប្រើហិង្សាវាយទៅលើជនរងគ្រោះ បង្កការភ្ញាក់ផ្អើលដល់អ្នកភូមិនាំគ្នាឃាត់និងរាយការណ៍មកសមត្ថកិច្ចមូលដ្ឋានទៅធ្វើអន្តរាគមន៍និងឃាត់ជនសង្ស័យកមកសាកសួរ។
ចំណែកជនរងគ្រោះត្រូវបានក្រុមគ្រួសារ ប្រញាប់ប្រញាល់ដឹកយកទៅព្យាបាលនៅឯមន្ទីរពេទ្យបង្អែកខេត្តស្វាយរៀង។
បច្ចុប្បន្នជនសង្ស័យទាំង២នាក់ត្រូវបានសមត្ថកិច្ចឃាត់ខ្លួននៅអធិការដ្ឋាននគរបាលស្រុកដើម្បីចាត់ការបន្តតាមច្បាប់៕
ដោយ៖ សុថាន
