សារព័ត៌មាន នគរវត្ត តែងតែនាំមុខគេជានិច្ច
សារព័ត៌មាន Reuters បានផ្សាយថា វិមានប្រធានាធិបតីបារាំង បានឱ្យដឹងកាលពីថ្ងៃអាទិត្យ ទី១០ ខែមីនាថា ដំណើរទស្សនកិច្ចរបស់លោកប្រធានាធិបតី អេមម៉ានុយអែល ម៉ាក្រុង ទៅកាន់ប្រទេស អ៊ុយក្រែន នឹងត្រូវធ្វើឡើងនៅប៉ុន្មានសប្ដាហ៍ខាងមុខវិញ ហើយនេះគឺជាលើកទី៣ ដែលគម្រោងទស្សនកិច្ចទៅកាន់ទីក្រុងកៀវត្រូវបានលើកពេលចាប់តាំងពីខែកុម្ភៈមក។
លោក ម៉ាក្រុង ដំបូងឡើយមានគម្រោងធ្វើទស្សនកិច្ចទៅកាន់ទីក្រុងកៀវ កាលពីខែកុម្ភៈកន្លងទៅនេះ ដើម្បីចុះហត្ថលេខាលើកិច្ចព្រមព្រៀងសន្តិសុខទ្វេភាគីជាមួយ លោកប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី។ តែគម្រោងនេះត្រូវបានលើកពេល ហើយលោកហ្សេលេនស្គី ត្រូវធ្វើដំណើរទស្សនកិច្ចទៅកាន់ទីក្រុងប៉ារីស ដើម្បីចុះហត្ថលេខាលើកិច្ចព្រមព្រៀងនេះជាមួយលោក ម៉ាក្រុង។ តាមក្រុមមន្ត្រីការទូត គម្រោងទី២នៃដំណើរទស្សនកិច្ចរបស់លោក ម៉ាក្រុង ត្រូវធ្វើឡើងនៅដើមខែមីនា តែស្រាប់តែត្រូវបានលើកពេលដូចគ្នា។
យ៉ាងណាក៏ដោយ ក្នុងសេចក្ដីថ្លែងការណ៍មួយ វិមានប្រធានាធិបតីបារាំងបានបញ្ជាក់ថាប្រមុខរដ្ឋនៃប្រទេសទាំង២បានយល់ព្រមបន្តរក្សាទំនាក់ទំនងជិតស្និទ្ធ ជាពិសេសពាក់ព័ន្ធនឹងដំណើរទស្សនកិច្ចរបស់លោក ម៉ាក្រុងទៅកាន់អ៊ុយក្រែន ដែលអាចនឹងត្រូវធ្វើឡើងនៅប៉ុន្មានសប្ដាហ៍ខាងមុខនេះ។
ការប្រកាសពីការផ្អាកការធ្វើទស្សនកិច្ចរបស់លោក ម៉ាក្រុង កើតមានឡើងតែប៉ុន្មានថ្ងៃប៉ុណ្ណោះ បន្ទាប់ពីមានសេចក្ដីរាយការណ៍ថា មីស៊ីលរបស់រុស្ស៉ីមួយគ្រាប់បានធ្លាក់នៅចម្ងាយប៉ុន្មានរយម៉ែត្រប៉ុណ្ណោះពីលោក ហ្សេលេនស្គី និងនាយករដ្ឋមន្ត្រីក្រិក អំឡុងមេដឹកនាំទាំង២ បំពេញទស្សនកិច្ចក្នុងទីក្រុងអូដេសា ខណៈតាមគម្រោង លោក ម៉ាក្រុង ក៏ត្រូវធ្វើទស្សនកិច្ចទៅកាន់ទីក្រុងអូដេសា ផងដែរ៕ ដោយ៖ ធីរីណា
រូបថត៖ AFP
