ទំនាស់ពាក្យសម្ដីបន្តិចន្តួចសោះក្លាយជាហិង្សា ខណៈបុរសម្នាក់ដេកពេទ្យ រីឯបុរសពីរនាក់ត្រូវសមត្ថកិច្ចចាប់វាយខ្នោះ

ចែករំលែក៖

ខេត្តបាត់ដំបង៖ ស្នងការដ្ឋាននគរបាលខេត្តបាត់ដំបង បានឱ្យដឹងនៅថ្ងៃទី១១ ខែមីនា ឆ្នាំ២០២៤នេះថា ដោយសារតែទំនាស់ពាក្យសម្ដីបន្តិចន្តួចសោះ បានធ្វើឱ្យបុរសម្នាក់ត្រូវបានគេដឹកបញ្ជូនទៅសង្គ្រោះនៅមន្ទីរពេទ្យបង្អែក ខណៈបុរសពីរនាក់ក្លាយជាជនសង័្សយ ក៏ត្រូវកម្លាំងសមត្ថកិច្ចនគរបាលចុះទៅឃាត់ខ្លួនយកមកអនុវត្តតាមច្បាប់នៅស្រុកភ្នំព្រឹក។

ករណីហិង្សានេះ បានកេីតឡេីងកាលពីថ្ងៃទី១០ខែមីនា ឆ្នាំ២០២៤ វេលាម៉ោង១៥ និង ៥០ នាទី មានករណីហិង្សា ដោយចេតនាមានស្ថាន ទម្ងន់ទោស(ប្រើប្រាស់ដំបង កើតឡើង ០១ លើក នៅចំណុចក្រុមទី០៥ ភូមិភ្នំប្រាំពីរ ឃុំ បួរ ស្រុកភ្នំព្រឹក ខេត្តបាត់ដំបង ដែលករណីនេះ បង្កដោយជនសង្ស័យចំនួន ០២ នាក់ឈ្មោះ ស៊ី សុផា ភេទប្រុស មុខរបរកម្មករនិងឈ្មោះ វ៉េត សាវៀត ភេទប្រុស អាយុ ៣១ ឆ្នាំ មុខរបរជា កម្មករ ទាំង០២នាក់ រស់នៅភូមិ ភ្នំប្រាំពីរ ឃុំបួរ ស្រុកភ្នំព្រឹក ខេត្តបាត់ដំបង បានធ្វើសកម្មភាពប្រើប្រាស់ដំបងវាយទៅលើជនរងគ្រោះ ឈ្មោះ សុត វើន ភេទប្រុសអាយុ៣៨ ឆ្នាំ រស់នៅភូមិភ្នំប្រាំពីរ ឃុំបួរ ស្រុភ្នំព្រឹក ខេត្តបាត់ដំបង មុខរបរ ជាកម្មករ ដូចគ្នាបណ្តាលឱ្យរងបួស ហើយត្រូវបានក្រុមគ្រួសារបញ្ជូនទៅកាន់មន្ទីរពេទ្យស្រុកសំពៅលូន។

ក្រោយកើតហេតុក្រុមគ្រួសារជនរងគ្រោះបានដាក់ពាក្យបណ្តឹងចូលមកសមត្ថកិច្ចនគរបាលស្រុកភ្នំព្រឹកដែលមាន លោកវរសេនីយ៍ទោ ហេង បារាំង អធិការនគរបាលស្រុក និងអនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង និងលោកឧត្តមសេនីយ៍ត្រី លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ កម្លាំងជំនាញផ្នែកនគរបាលយុត្តិធម៌ នៃអធិការដ្ឋាននគរបាលស្រុក រួមជាមួយកម្លាំងប៉ុស្តិ៍នគរបាលរដ្ឋបាលបួរ ស្រាវជ្រាវនិងឃាត់ខ្លួនជនសង្ស័យបានចំនួន ០២ នាក់ខាងលើនិងនាំយកមកសាកសួរនៅអធិការដ្ឋាននគរបាលស្រុក ។

ក្រោយពេលសាកសួររួច ជនសង្ស័យទាំង០២នាក់បានឆ្លើយសារភាពថា ពួក ខ្លួន ពិតជាបានធ្វើសកម្មភាព ប្រើប្រាស់ដំបងវាយទៅលើជនរងគ្រោះប្រាកដមែន ដោយមូលហេតុទំនាស់ពាក្យសម្តី នៅចំណុចក្រុមទី០៥ ភូមិភ្នំប្រាំពីរ ឃុំបួរ ស្រុកភ្នំព្រឹក ខេត្តបាត់ដំបង កាលពីថ្ងៃទី ១០ ខែមីនា ឆ្នាំ២០២៤ ។

-វត្ថុតាងដកហូតមាន ៖

១-ដំបងឈើប្រវែងសរុប ៩៦ សង់ទីម៉ែត្រ ទំហំ ៨ សង់ទីម៉ែត្រ ចំនួន ០១ ដើម ។

២-បំណែកកំណាត់ឬស្សីចំនួន ០៣ កំណាត់ ។

បច្ចុប្បន្នជនសង្ស័យរួមទាំងវត្ថុតាងខាងលើ ត្រូវបានសមត្ថកិច្ចបានកសាងសំណុំរឿងបញ្ជូនមកកាន់ការិយាល័យជំនាញ នៃស្នងការដ្ឋាននគរបាលខេត្តបាត់ដំបងចាត់ការតាមនីតិវិធី ច្បាប់ ៕