សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានរងរបួសធ្ងន់ធ្ងរសន្លប់បាត់បង់ស្មារតី បន្ទាប់ពីស្រវឹងស្រាបើកម៉ូតូសណ្ដោងរុឺម៉កជ្រុលទៅបុកគល់ស្ពានអាកាសស្ទឹងមានជ័យ កាលពីវេលាម៉ោង៩និង៣០នាទីយប់ថ្ងៃសៅរ៍ទី១៦ ខែ មីនា ឆ្នាំ២០២៤ ស្ថិតនៅតាមបណ្ដោយផ្លូវលេខ២១៧ ត្រង់ចំណុចគល់ស្ពានអាកាសស្ទឹងមានជ័យ ផ្នែកខាងត្បូងជិតផ្សារសុវណ្ណា ក្នុងសង្កាត់ទំនប់ទឹក ខណ្ឌបឹងកេងកង រាជធានីភ្នំពេញ ។
តាមប្រភពពីកន្លែងកើតហេតុបានឱ្យដឹងថា មុនពេលកើតហេតុគេឃើញបុរសម្នាក់មានស្ថានភាពស្រវឹងស្រាបើកម៉ូតូសណ្ដោងរុឺម៉ក ពណ៌ក្រហម ពាក់ផ្លាកលេខភ្នំពេញ1FC-3844 ធ្វើដំណើរក្នុងទិសដៅពីត្បូងទៅជើង ហេីយបេីកឡើងស្ពានអាកាសស្ទឹងមានជ័យ ខណះមកដល់ចំណុចកើតហេតុខាងលើបានបុកក្បាលស្ពានពេញទំហឹងបណ្ដាលឱ្យម៉ូតូសណ្ដោងរុឺម៉កក្រឡាប់ផ្ងារជើងម្ខាង រីឯម្ចាស់ធ្លាក់មកលើស្ពានរងរបួសសន្លប់ស្ដូកស្ដឹង ។
ក្រោយកេីតហេតុភ្លាមៗ កម្លាំងសមត្ថកិច្ចគោលដៅចរាចរណ៍ក្រុងនៅខាងក្រោមស្ពានបានចុះមកចំណុចកើតហេតុ ហេីយបានទាក់ទងទៅរថយន្តសាមុយមន្ទីរពេទ្យរុស្សីដឹកជនរងគ្រោះយកទៅសង្គ្រោះអាយុជីវិត ។ ដោយឡែកសមត្ថកិច្ចមូលដ្ឋានបានយកម៉ូតូសណ្ដោងរុឺម៉ករបស់ជនរងគ្រោះទៅរក្សាទុកនៅប៉ុស្តិ៍នគរបាលរដ្ឋបាលទំនប់ទឹក រង់ចាំសាច់ញ្ញាតិឬជនរងគ្រោះចេញពីមន្ទីរពេទ្យ យកឯកសារមកផ្ទៀងផ្ទាត់នឹងប្រគល់ជូនវិញ ៕
ដោយ ៖ ភារ៉ា ដង្កោ
