សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្រសួងសាធារណការ និងដឹកជញ្ជូន នៅព្រឹកថ្ងៃសៅរ៍ទី២៣ ខែមីនា ឆ្នាំ២០២៤នេះ បានបង្ហាញពីការប្រើប្រាស់គន្លងស្វ័យប្រវត្តិ ETC ដើម្បីចេញចូលផ្លូវល្បឿនលឿន បានលឿនរហ័ស ចៀសវាងការកកស្ទះ។
ក្រសួងសាធារណការ បានឱ្យដឹងទៀតថា កំណើនចរាចរណ៍ និងការមិនទាន់បានយល់ច្បាស់ពី របៀបប្រើប្រាស់គន្លងចូលចេញ ជាកត្តានាំឱ្យមានការកកស្ទះ នៅតាមបញ្ជរផ្លូវល្បឿនលឿន។ ក្រសួងសាធារណការ និងដឹកជញ្ជូន សូមណែនាំបងប្អូនប្រជាពលរដ្ឋ ដែលជាអ្នកប្រើប្រាស់ផ្លូវល្បឿនលឿន ឬគ្រោងនឹងធ្វើដំណើរលើផ្លូវល្បឿនលឿន មេត្តាយកចិត្តទុកដាក់ខ្ពស់ លើការប្រើប្រាស់គន្លងធម្មតា ឬគន្លងស្វ័យប្រវត្តិ ETC សម្រាប់ចេញចូលផ្លូវល្បឿនលឿន ដូចខាងក្រោម៖
– គន្លងធម្មតា ⬇️ តម្រូវឱ្យយកកាតនៅច្រកចូល និងបង់សាច់ប្រាក់នៅច្រកចេញ។ ក្នុងករណីមានចរាចរណ៍មមាញឹក លោកអ្នកអាចប្រឈមនឹងការរង់ចាំយូរនៅពេលទូទាត់ និងអាប់សាច់ប្រាក់នៅច្រកចេញ។
– គន្លងស្វ័យប្រវត្តិ ETC ជាគន្លងអាទិភាព នៅខាងឆ្វេងបង្អស់ អនុញ្ញាតឱ្យបងប្អូនចេញចូលបានលឿនរហ័ស ដោយមិនបាច់រង់ចាំយូរ។ ដើម្បីប្រើប្រាស់គន្លង ETC នេះម្ចាស់យានយន្តត្រូវបំពាក់ឧបករណ៍ ETC នៅអគាររដ្ឋបាល គ្រប់ច្រកចូលផ្លូវល្បឿនលឿន ឬ នៅមណ្ឌលផ្តល់សេវាសាធារណៈ ទីស្តីការក្រសួងសាធារណការ និងដឹកជញ្ជូន និងមណ្ឌលផ្តល់សេវាសាធារណៈនៅផ្សារទំនើប AEON Mall មានជ័យ។ សូមចូលទៅកាន់គេហទំព័រ https://ew.mpwt.gov.kh ដើម្បីដឹងពីវិធីបញ្ចូលសមតុល្យ និងពិនិត្យសមតុល្យទឹកប្រាក់ដែលបានបញ្ចូល។
សូមបញ្ជាក់ថា៖ យានយន្តដែលមិនមានបំពាក់ឧបករណ៍ ETC គឺពិតមិនអាចឆ្លងរបារស្វ័យប្រវត្តិ នៃគន្លង ETC បានឡើយ។ ក្រសួងជឿជាក់ថា ការដែលបងប្អូនបានស្វែងយល់បន្ថែមពីគន្លងចូលចេញ រួមនឹងការគោរពច្បាប់ស្តីពីចរាចរណ៍ផ្លូវគោក ការគោរពលក្ខខណ្ឌនៃការប្រើប្រាស់ផ្លូវល្បឿនលឿន និងការចេះយោគយល់អធ្យាស្រ័យគ្នា គឺពិតជាអាចចូលរួមទប់ស្កាត់ កាត់បន្ថយគ្រោះថ្នាក់ចរាចរណ៍ និងបង្ការការកកស្ទះបាន៕
ដោយ៖ តារា
