សារព័ត៌មាន នគរវត្ត តែងតែនាំមុខគេជានិច្ច
វែលបានខកខានការប្រកួត Euro 2024 យ៉ាងឈឺចាប់ ខណៈដែលពួកគេបានរងបរាជ័យដោយការស៊ុតបាល់ប៉េណាល់ទីក្នុងវគ្គផ្តាច់ព្រ័ត្រ Play-off របស់ពួកគេជាមួយប៉ូឡូញនៅទីក្រុង Cardiff កាលពីរំលងអធ្រាត្រឈានចូលថ្ងៃទី២៧ ខែមីនានេះ។
ក្នុងការស៊ុតបាល់ប៉េណាល់ទីកាត់សេចក្តីមិនចូលសម្រាប់ក្រុមវែលដោយកីឡាករ Daniel James ត្រូវបានសង្គ្រោះដោយអ្នកចាំទី Wojciech Szczesny ខណៈដែលប៉ូឡូញបានស៊ុតចូលទាំង៥គ្រាប់។ នេះជាការបរាជ័យមួយសម្រាប់គ្រូបង្វឹកលោក Robert Page និងកីឡាកររបស់គាត់ក្នុងការចាញ់ ក្រុមប៉ូឡូញ ដែលមិនមានគ្រាប់បាល់កើតឡើងក្នុងអំឡុងពេលប្រកួតពេញ១២០នាទី។
ក្រុមប៉ូឡូញរបស់ Robert Lewandowski ឥឡូវនេះបានកក់កៅអីរួចរាល់ដោយចូលរួមជាមួយបារាំង ហូឡង់ និងអូទ្រីសក្នុងពូល D នៅព្រឹត្តិការណ៍យូរ៉ូរដូវក្តៅនេះនៅប្រទេសអាល្លឺម៉ង់។
២ក្រុមទៀតដែលបានកក់កៅអីទៅកាន់ប្រទេសអាល្លឺម៉ង់២០២៤ដែរនោះគឺក្រុមអ៊ុយក្រែនដែលបានយកឈ្នះអ៊ីស្លង់២ទល់១ និងក្រុមហ្សកហ្ស៊ីបានយកឈ្នះក្រិច៤ទល់២ក្នុងបាល់ប៉េណាល់ទីផងដែរ ៕
ដោយ៖ ភារៈ(រូបភាព ៖ BBC Sport)
