សារព័ត៌មាន នគរវត្ត តែងតែនាំមុខគេជានិច្ច
ប្រទេសរុស្ស៊ីកាលពីថ្ងៃទី 29 ខែមីនាបាននិយាយថា បណ្តាប្រទេសនានាចាំបាច់ត្រូវមានវិធីសាស្រ្តថ្មីចំពោះកូរ៉េខាងជើង ដោយចោទប្រកាន់សហរដ្ឋអាមេរិកនិងសម្ព័ន្ធមិត្តរបស់ខ្លួនពីបទបង្កើនភាពតានតឹងផ្នែកយោធានៅក្នុងតំបន់អាស៊ី និងព្យាយាម “បិទផ្លូវដង្ហើម” ទីក្រុងព្យុងយ៉ាង។
អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បាននិយាយថា “យើងឃើញយ៉ាងច្បាស់ថា ក្រុមប្រឹក្សាសន្តិសុខអង្គការសហប្រជាជាតិមិនអាចបន្តប្រើវិធីចាស់ដើម្បីដោះស្រាយបញ្ហានៅឧបទ្វីបកូរ៉េបានទេ”។
យោងតាមទីភ្នាក់ងារសារព័ត៌មាន Reuters លោកស្រី Zakharova បាននិយាយថា សហរដ្ឋអាមេរិកកំពុងបង្កភាពតានតឹងផ្នែកយោធា ការរឹតបន្តឹងអន្តរជាតិបានបរាជ័យក្នុងការធ្វើឱ្យស្ថានភាពសន្តិសុខប្រសើរឡើង និងបានបង្កឱ្យមានផលវិបាកមនុស្សធម៌យ៉ាងធ្ងន់ធ្ងរសម្រាប់ប្រជាជនកូរ៉េខាងជើង។
លោកស្រីបាននិយាយថា “សហរដ្ឋអាមេរិកនិងសម្ព័ន្ធមិត្តបានបង្ហាញយ៉ាងច្បាស់ថា ផលប្រយោជន៍របស់ពួកគេគឺគ្មានអ្វីក្រៅពីការបិទផ្លូវដង្ហើមកូរ៉េខាងជើងជាមួយនឹងមធ្យោបាយដែលមានទាំងអស់ ហើយថាដំណោះស្រាយដោយសន្តិវិធីគឺពិតជាមិនមាននៅក្នុងរបៀបវារៈនោះទេ”។
សេចក្តីថ្លែងការណ៍នេះបានធ្វើឡើងបន្ទាប់ពីប្រទេសរុស្ស៊ីបានវេតូការពន្យារពេលនៃក្រុមអ្នកជំនាញដែលឃ្លាំមើលការអនុវត្តទណ្ឌកម្មរបស់អង្គការសហប្រជាជាតិប្រឆាំងនឹងប្រទេសកូរ៉េខាងជើងទាក់ទងនឹងកម្មវិធីអាវុធនុយក្លេអ៊ែរ និងមីស៊ីលផ្លោងរបស់ប្រទេសនេះ។
រុស្ស៊ីជឿថា ការងាររបស់អ្នកជំនាញមិនមានកម្មវត្ថុឬលំអៀងទេ ហើយថាពួកគេបានក្លាយជាឧបករណ៍របស់លោកខាងលិច។ យោងតាមលោកស្រី Zakharova ប្រទេសរុស្ស៊ីបានស្វែងរកការសម្របសម្រួលមួយ ដែលទណ្ឌកម្មនឹងត្រូវបានពិចារណាក្នុងរយៈពេលជាក់លាក់មួយ ទោះបីជាសំណើនោះត្រូវបានបំពេញដោយ “អរិភាព” ពីទីក្រុងវ៉ាស៊ីនតោនក៏ដោយ៕ ដោយ៖ ធីរីណា
រូបថត៖ KCNA
