សារព័ត៌មាន នគរវត្ត តែងតែនាំមុខគេជានិច្ច
សារព័ត៌មាន AFP នៅថ្ងៃទី៦ខែមេសា បានផ្សាយថា អាជ្ញាធរក្នុងប្រទេសអេក្វាទ័រ បានចូលចាប់ខ្លួនអតីតអនុប្រធានាធិបតី លោក Jorge Glas ចេញពីស្ថានទូតម៉ិចស៉ិក កាលពីល្ងាចថ្ងៃសុក្រ ទី៥ ខែមេសា (ម៉ោងក្នុងតំបន់) ដោយជំរុញឱ្យរដ្ឋាភិបាលម៉ិចស៉ិកប្រកាសផ្ដាច់ទំនាក់ទំនងការទូត។
លោក Jorge Glas ជាអតីតអនុប្រធានាធិបតីអេក្វាទ័រ ដែលត្រូវបានតុលាការកាត់ទោសចំនួន២លើក ពីបទពុករលួយ បានសម្ងំរស់នៅក្នុងស្ថានទូតម៉ិចស៉ិក ប្រចាំទីក្រុងគីតូ ចាប់តាំងពីរូបលោកស្វែងរកសិទ្ធិជ្រកកោនកាលពីខែធ្នូ ឆ្នាំ២០២៣ ជាសំណើមួយដែលរដ្ឋាភិបាលម៉ិចស៉ិកបានទទួលយកកាលពីថ្ងៃសុក្រ សប្ដាហ៍នេះ។ ប៉ុន្តែ អេកា្វទ័រចាត់ទុកការផ្ដល់សិទ្ធិជ្រកកោននេះជាទង្វើខុសច្បាប់។
ក្នុងសារមួយបង្ហោះលើបណ្ដាញទំនាក់ទំនងសង្គម X ប្រធានាធិបតីម៉ិចស៉ិក លោក Andres Manuel Lopez Obrador បាននិយាយថាប៉ូលិសអេក្វាទ័របានសម្រុកចូលទាំងកម្រោលក្នុងស្ថានទូតម៉ិចស៉ិកក្នុងទីក្រុងគីតូ មុននឹងឈានដល់ការចាប់ខ្លួនលោក Glas។ ការិយាល័យប្រធានាធិបតីអេក្វាទ័រ ក៏បានចេញ សេចក្ដីថ្លែងការណ៍មួយផងដែរ បញ្ជាក់ពីការចាប់ខ្លួនលោក Glas ដែលធ្លាប់កាន់តំណែងជាអនុប្រធានាធិបតី នៅក្រោមរដ្ឋបាលអតីតប្រធានាធិបតី លោក Rafael Correa ចន្លោះពីឆ្នាំ២០១៣ ដល់ឆ្នាំ២០១៧។
ការចាប់ខ្លួននេះដែរ កើតមានឡើងចំពេលម៉ិចស៉ិកនិងអេក្វាទ័រ កំពុងភាពតានតឹងការទូតនឹងគ្នា ដោយកាលពីថ្ងៃព្រហស្បតិ៍កន្លងទៅនេះ អេក្វាទ័រ បានប្រកាសចាត់ទុកឯកអគ្គរដ្ឋទូតម៉ិចស៉ិក ប្រចាំទីក្រុងគីតូ ជាជនមិនត្រូវបានស្វាគមន៍ ហើយថាការសម្រេចចិត្តបែបនេះ ធ្វើឡើងដោយសារការអត្ថាធិប្បាយ មិនអាចទទួលយកបានរបស់លោកប្រធានាធិបតី Lopez Obrador។ ជាការឆ្លើយតប លោក Lopez Obrador បានបញ្ជាឱ្យរដ្ឋមន្ត្រីការបរទេសម៉ិចស៉ិកផ្ដាច់ទំនាក់ទំនងការទូតជាមួយអេក្វាទ័រ និងចាត់ទុកការចាប់ខ្លួនលោក Glas ជាទង្វើផ្ដាច់ការ និងបំពានលើច្បាប់អន្តរជាតិ ព្រមទាំងអធិបតេយ្យរបស់ម៉ិចស៉ិក៕
ដោយ៖ ធីរីណា(រូបថត៖ Reuters)
