🔥🔥តូបលក់ដូរនិងផ្ទះពលរដ្ឋចំនួន៥ខ្នងត្រូវអគ្គិភ័យឆាបឆេះធ្វើឱ្យមនុស្ស៥នាក់រងរបួសដោយសារផ្ទុះធុងហ្គាស

ចែករំលែក៖

ខេត្តព្រះវិហារ ៖ មានករណីអគ្គិភ័យបានកើតឡើងដោយសារផ្ទុះធុងហ្គាសបង្កជាអគ្គិភ័យ បណ្ដាលឱ្យឆាបឆេះតូបលក់ដូរ និងផ្ទះប្រជាពលរដ្ឋជាច្រើនខ្នង។

ហេតុការណ៍អគ្គិភ័យឆាបឆេះតូបលក់ដូរនិងផ្ទះប្រជាពលរដ្ឋនេះបានកើតឡើងនៅវេលាម៉ោង១៤៖៣០នាទីរសៀល ថ្ងៃទី១៨ ខែមេសា ឆ្នាំ២០២៤ស្ថិតក្នុងភូមិស្អាង ឃុំស្អាង ស្រុកជ័យសែន ខេត្តព្រះវិហារ។

សមត្ថកិច្ចបានឱ្យដឹងថា អគ្គិភ័យនេះបានឆាបឆេះផ្ទះបងប្អូនប្រជាពលរដ្ឋអស់ចំនួន ២ខ្នង ខូចខាតអស់ទាំងស្រុង និង៣ខ្នងទៀតខូចខាតអស់ប្រហែល ៤០ ភាគរយ ករណីខាងលើនេះបណ្ដាលមកពីផ្ទុះធុងហ្គាស។

សមត្ថកិច្ចបន្តថា ម្ចាស់ផ្ទះខាងលើមាន ឈ្មោះ រិន សំបូរ អាយុ ៤០ឆ្នាំ ជាអ្នកលក់និងដូរហ្គាស ( ធុងហ្គាស មានសភាពចាស់ មានច្រែះ ស្របពេលអាកាសធាតុ ឡើងដល់៤២អង្សា) ដែលអគ្គិភ័យនេះផ្តើមចេញពីផ្ទះនោះទៅ។

ជនរងគ្រោះរបួសសើស្បែក៥នាក់ ដោយសារការចូលរួមជួយពន្លត់ភ្លើង។

ករណីនេះ សមត្ថកិច្ចកំពុងធ្វើការស្រាវជ្រាវបន្តទៀត។

ក្នុងហេតុការណ៍នោះដែរមានកងកម្លាំងអធិការដ្ឋាននគរបាលស្រុកជ័យសែន អធិការដ្ឋាននគរបាលស្រុកឆែបដោយប្រើប្រាស់ទឹកអស់ចំនួន ១០ រថយន្តទើបបានពន្លត់រលត់ដោយជោគជ័យនិង មិនបណ្តាលឱ្យរាលដាលទៅផ្ទះផ្សេងដទៃទៀត នៅវេលាម៉ោង ១៦៖២០នាទីថ្ងៃដដែល៕