សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក ឃួង ស្រេង សមាជិកគណៈកម្មាធិការកណ្តាល គណបក្សប្រជាជនកម្ពុជា និងជាប្រធានគណៈកម្មាធិការគណបក្ស ប្រជាជនកម្ពុជារាជធានីភ្នំពេញ នាព្រឹកថ្ងៃទី១៧ ខែឧសភា ឆ្នាំ២០២៤នេះបានអញ្ជើញចូលរួមក្នុងពីធី “បើកយុទ្ធនាការ ឃោសនាបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សា ខណ្ឌ អាណត្តិទី៤ ឆ្នាំ២០២៤” ក្រោមអធិបតីភាពដ៏ខ្ពង់ខ្ពស់បំផុត សម្តេចវិបុលសេនាភក្តី សាយ ឈុំ អនុ ប្រធានគណបក្ស និងជា ប្រធានក្រុមការងារគណបក្សចុះមូលដ្ឋានរាជធានីភ្នំពេញ នៅមន្ទីរបក្សរាជធានីភ្នំពេញ ។
លោក ឃួង ស្រេង បានមានប្រសាសន៍ថា៖រដ្ឋបាលរាជធានីភ្នំពេញ មានសមាជិកក្រុមប្រឹក្សា សង្កាត់ក្នុងមុខតំណែង សរុបចំនួន ៨៩៩ រូប ក្នុងនោះ សមាជិក ក្រុមប្រឹក្សាសង្កាត់របស់គណបក្សប្រជាជនកម្ពុជា មានចំនួន ៧៤៣ រូប។ ចំពោះសកម្មភាពការងារ ដឹកនាំរបស់គណបក្សប្រជាជនកម្ពុជារាជធានីភ្នំពេញ ឈានឆ្ពោះទៅ កាន់ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខណ្ឌ អាណត្តិទី៤នេះ បញ្ហាសន្តិសុខ-សណ្តាប់ធ្នាប់សាធារណៈ នៅទូទាំងរាជធានីភ្នំពេញមានភាពល្អប្រសើរ និងធានាប្រក្រតី ភាពនៃជីវភាពរស់នៅរបស់បងប្អូនប្រជាពលរដ្ឋគ្រប់មជ្ឈដ្ឋាន។
លោក បានបញ្ជាក់ថា៖ គណបក្សប្រជាជនកម្ពុជារាជធានីភ្នំពេញនឹងយកបានជ័យជំនៈយ៉ាងពិតប្រាកដក្នុងការបោះឆ្នោត នៅថ្ងៃអាទិត្យ ទី២៦ ខែខុសភា ឆ្នាំ២០២៤ ខាងមុខនេះ ដោយសារតែយើង មានអង្គបោះឆ្នោតសមាជិកព្រឹទ្ធសភា របស់គណបក្សប្រជាជនកម្ពុជា នៅរាជធានីភ្នំពេញ ដែលបានចុះឈ្មោះបោះឆ្នោត មានចំនួន ៧៤៣ រូប គឺស្មើនឹងជិត ៨៣% ជាអត្រា ច្រើនលើសលុប ធៀបនឹងអង្គបោះឆ្នោតសរុបទូទាំង រាជធានីភ្នំពេញ។គណបក្សយើងមានសាមគ្គីភាពឯកភាពផ្ទៃក្នុងរឹងមាំ តាំងពីលើដល់ក្រោម។ គម្រោង “ព្រែកជីកហ្វូណន-តេជោ” ដែលជាគំនិតផ្តួចផ្តើម ដ៏ខ្ពង់ខ្ពស់បំផុតរបស់ សម្តេចតេជោប្រធានគណបក្ស និងកំពុងជំរុញការអនុវត្តដោយរាជរដ្ឋាភិបាលកម្ពុជា អាណត្តិទី៧ ក្រោមការដឹកនាំរបស់ សម្តេចធិបតីនាយក រដ្ឋមន្ត្រី ទទួលបាន ការគាំទ្រភ្លូកទឹកភ្លូកដី ពីប្រជាពលរដ្ឋខ្មែរគ្រប់មជ្ឈដ្ឋាន។
សម្តេចវិបុលសេនាភក្តី សាយ ឈុំ បានមានប្រសាសន៍លើកឡើងថា៖ យុទ្ធនាការ ឃោសនាបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សា ខណ្ឌ អាណត្តិទី៤ ចាប់ផ្តើមឡើងពីថ្ងៃទី១៧ដល់ថ្ងៃទី២៤ឧសភាឆ្នាំ២០២៤ ដែលជាឱកាសអោយ
គណបក្សប្រជាជនកម្ពុជារាជធានី ខណ្ឌបានផ្សព្វផ្សាយពីគោលនយោបាយសំខាន់ៗរបស់ក្រុមប្រឹក្សារាជធានី ខណ្ឌ អោយបានទូលំទូលាយ ដើម្បីឈានទៅដណ្តើមជ័យជំនៈនៅថ្ងៃទី២៦ឧសភានេះ។
សម្តេចវិបុល បានបន្តថា អាជ្ញាធររាជធានី ខណ្ឌបាន បំពេញតួនាទីរបស់ខ្លួនបានយ៉ាងល្អ ដោយបានធ្វើអោយរាជធានីភ្នំពេញ រក្សាបាននៅសណ្តាប់ធ្នាប់ សន្តិសុខល្អប្រសើរ ជាមួយនិងការអភិវឌ្ឍរីកចំរើនយ៉ាងឆាប់រហ័ស។ សម្តេចបានជម្រុញអោយ ក្រុមប្រឹក្សារាជធានី ខណ្ឌ អនុវត្តនូវគោលនយោបាយឈ្នះឈ្នះរបស់សម្តេចតេជោហ៊ុន សែន ដែលគោលនយោបាយនេះបានធ្វើអោយកម្ពុជាបញ្ចប់សង្គ្រាមទាំងស្រុង។ សូមថែរក្សាសន្តិភាពអោយបានគង់វង្ស ជាមួយនិងការកំចាត់ពួកជ្រុលនិយមដែលចង់បំផ្លាញសន្តិភាព។ការពាររដ្ឋធម្មនុញ្ញា និងប្រឆាំងរាល់សកម្មភាពដែលប៉ះពាល់ដល់ព្រះមហាក្សត្រ។
សម្តេចវិបុល បានសូមអោយសមាជិកក្រុមប្រឹក្សា សង្កាត់ក្នុងមុខតំណែងដែលជាអង្គបោះឆ្នោត សូមទៅបោះឆ្នោតជូនគណបក្សប្រជាជនកម្ពុជាទាំងអស់គ្នា នៅថ្ងៃអាទិត្យ ទី២៦ ខែខុសភា ឆ្នាំ២០២៤ ខាងមុខនេះ។
សម្តេចវិបុល សូមអោយគាំទ្រគម្រោង “ព្រែកជីកហ្វូណន-តេជោ” ដែលជាគំនិតផ្តួចផ្តើម ដ៏ខ្ពង់ខ្ពស់បំផុតរបស់ សម្តេចតេជោប្រធានគណបក្ស និងកំពុងជំរុញការអនុវត្តដោយរាជរដ្ឋាភិបាលកម្ពុជា អាណត្តិទី៧ ក្រោមការដឹកនាំរបស់ សម្តេចធិបតីនាយក រដ្ឋមន្ត្រី ក្លាយជាមហាចលនាជាតិ ដើម្បីឱ្យ គម្រោងនេះទទួលបានជោគជ័យ ព្រោះថា គម្រោងនេះ មានផលប្រយោជន៍ធំធេងណាស់សំរាប់ជាតិ និងជាទ្រព្យសម្បត្តិដ៏ មហាសាលរបស់ប្រជាជនកម្ពុជា៕
ដោយ ៖ សំរិត
