សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ មន្ត្រីនគរបាល នៃអធិការដ្ឋានស្រុកភ្នំក្រវាញ បានឱ្យដឹងនៅព្រឹកថ្ងៃទី២៣ ខែឧសភា ឆ្នាំ២០២៤នេះថា កម្លាំងសមត្ថកិច្ចស្រុកភ្នំក្រវាញ បានចុះស្រាវជ្រាវឃាត់ខ្លួនជនសង្ស័យ១នាក់ ក្រោយធ្វើសកម្មភាពលួចម៉ូតូ និងឈើចំនួន២សន្លឹក បានសម្រេចគេចខ្លួនបាត់ ២ថ្ងៃក្រោយជាប់ខ្នោះដៃ។
ប្រភពដដែលបន្តថា សមត្ថកិច្ច កាលពីថ្ងៃទី២២ ខែឧសភា ឆ្នាំ២០២៤ វេលាម៉ោង២និង៣០នាទីរសៀលបានទទួលពាក្យបណ្ដឹងពីឈ្មោះ សុខ សារ៉ន ភេទស្រី អាយុ៥៦ឆ្នាំ រស់នៅភូមិព្រែក១ ឃុំសំរោង ស្រុកភ្នំក្រវាញ ខេត្តពោធិ៍សាត់ ថាមានករណីជនសង្ស័យ១នាក់លួចយកម៉ូតូកញ្ចាស់១គ្រឿងម៉ាកវ៉េវអាល់ហ្វា នឹងឈើចំនួន២សន្លឹក នៅចំណុចភូមិព្រែក១ ឃុំសំរោង ស្រុកភ្នំក្រវាញ ខេត្តពោធិ៍សាត់។
របាយការណ៍របស់អធិការដ្ឋាននគរបាលស្រុកភ្នំក្រវាញ បានឲ្យដឹងថា កាលពីថ្ងៃទី២០ខែឧសភាឆ្នាំ២០២៤ វេលាម៉ោង៨ និង០០នាទីយប់ ជនសង្ស័យឈ្មោះ រី រ៉ី ភេទប្រុស អាយុ២២ឆ្នាំ រស់នៅភូមិស្ទឹងថ្មី ឃុំប្រមោយ ស្រុកវាលវែង ខេត្តពោធិ៍សាត់បានធ្វើសកម្មភាពលួចយកម៉ូតូ១គ្រឿងម៉ាកវ៉េវអាល់ហ្វា នឹងឈើចំនួន២សន្លឹក។
បច្ចុប្បន្នជនសង្ស័យត្រូវបានសមត្ថកិច្ចឃាត់ខ្លួននៅអធិការដ្ឋាននគរបាលស្រុកភ្នំក្រវាញដើម្បីកសាងសំណុំរឿងចាត់ការតាមនីតិវិធី៕
ដោយ៖ អរុណរះ
