សារព័ត៌មាន នគរវត្ត តែងតែនាំមុខគេជានិច្ច
ភ្ភ្នំពេញ៖ ឃាត់ខ្លួនស្ត្រីចំណាស់ដែលធ្វើសកម្មភាពចូលទៅក្នុងផ្ទះប្រជាពលរដ្ឋ លួចយកកាបូបលុយ ដែលមានមាស ៥ជី និងលុយជាង ២លានរៀល របស់លោកយាយម្នាក់ដែលទៅលេងផ្ទះកូនរបស់គាត់ និងកំពុងសម្រាន្តលង់លក់ មិនទាន់ក្រោកពីដំណេក បានសម្រេច គេចខ្លួនបាត់ដោយសុវត្ថិភាព ពេលនេះត្រូវបានជនរងគ្រោះស្រាវជ្រាវតាមរកឃេីញចាប់ប្រគល់អោយសមត្ថកិច្ច បែកធ្លាយជាមុខសញ្ញាចាស់ ធ្លាប់ធ្វើសកម្មភាពលួចជាច្រើនករណី នៅខណ្ឌជ្រោយចង្វា នៅខណ្ឌផ្សេងៗទៀតក្នុងរាជធានីភ្នំពេញ ។
ហេតុការណ៍ឃាត់ខ្លួននេះធ្វើឡើងកាលពីវេលាម៉ោង៣:៣០នាទីរសៀលថ្ងៃទី២៣ ខែឧសភា ឆ្នាំ២០២៤ នៅចំណុចបន្ទប់ជួលក្នុងភូមិទ្រា១ ក្រុម៤ សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ ។
ស្ត្រីចំណាស់ជាជនសង្ស័យ មានឈ្មោះ វណ្ណី អាយុ៥៩ឆ្នាំ មុខរបរមិនពិតប្រាកដ។ នៅចំពោះមុខសាច់ញាតិជនរងគ្រោះ ស្ត្រីចំណាស់បានសារភាពថា រូបគេពិតជាបានលួចកាបូបលុយនោះពិតមែន ចំណែកខ្សែដៃមាសទម្ងន់៥ជី រូបគេយកទៅលក់បានប្រាក់ចំនួន១.២០០ដុល្លារ។ តាមការបញ្ជាប់ពីចៅរបស់ជនរងគ្រោះផ្ទាល់ និងតាមរយៈកាមេរ៉ាសុវត្ថិភាពដែលបានបង្ហាញ បានឲ្យឃើញថា មុនពេលកើតហេតុ លោកយាយ ជាម្ចាស់កាបូបបានមកលេងផ្ទះកូនរបស់គាត់ ស្ថិតនៅក្នុងភូមិ៣ សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ ។ លុះនៅវេលាម៉ោង ៦ព្រឹកថ្ងៃទី២៣ ខែឧសភា ឆ្នាំ២០២៤ ម៉ោងក្នុងកាមេរ៉ាសុវត្ថិភាព ស្រាប់តែមានស្ត្រីជាជនសង្ស័យវ័យចំណាស់ម្នាក់ ស្លៀកឈុតពណ៌ត្រួយចេក មានមុខ និងភិនភាគ ដូចដែលកាមេរ៉ាចាប់ជាប់ មកចូលក្នុងផ្ទះ ហើយលួចយកកាបូបលុយរបស់លោកយាយ ដែលក្នុងកាបូបនោះ មានលុយជាង ២លានរៀល និងមាស ៥ជី គេចខ្លួនបាត់តែម្តង។
ក្រោយកើតហេតុ កូនរបស់ជនរងគ្រោះបានបញ្ជាក់ថា គាត់បានទៅដាក់ពាក្យបណ្តឹងនៅប៉ុស្តិ៍ជ្រោយចង្វា ហើយ និង មានគេប្រាប់កូនជនរងគ្រោះថា បានឃើញស្ត្រីដែលជាជនសង្ស័យរូបនេះ ស្នាក់នៅតាមបណ្តោយផ្លូវសឡា ក្នុងសង្កាត់ស្ទឹងមានជ័យទី១ ខណ្ឌមានជ័យ ទើបកូនជនរងគ្រោះបើករថយន្តចេញពីក្នុងសង្កាត់ជ្រោយចង្វាមកដល់ក៏ឃើញជនសង្ស័យរូបនេះមែន និងឃាត់ខ្លួនបានតែម្តង យកទៅកាន់ប៉ុស្តិ៍ស្ទឹងមានជ័យទី១ ដើម្បីរង់ចាំសមត្ថកិច្ចប៉ុស្តិ៍ជ្រោយចង្វាមកទទួល យកទៅចាត់ការបន្ត ព្រោះជាម្ចាស់ករណី ។
ប្រភពពីប្រជាពលរដ្ឋរស់នៅកន្លែងកើតហេតុបានប្រាប់ឱ្យដឹងថា ពួកគាត់មានការភ្ញាក់ផ្អើលជាខ្លាំង ខណៈមានសមត្ថកិច្ចមកឃាត់ស្ត្រីចំណាស់នោះ ។ ពួកគាត់មិនច្បាស់ថាស្ត្រីនោះរកស៉ីអ្វីនោះទេ គ្រាន់តែដឹងថាស្ត្រីនោះមានលុយចាយពេញៗដៃ ៕
ដោយ ៖ រ៉ារ៉ា
