🔥ឆេះបន្ទប់អគារកាសុីណូ (ញ៉ូវើល) ផ្អើលសមត្ថកិច្ចទាំងយប់នៅក្រុងបាវិត

ខេត្តស្វាយរៀង ៖ មានការភ្ញាក់ផ្អើលដល់បុគ្គលិកនិងសន្តិសុខរាយការណ៍ទៅសមត្ថកិច្ចមូលដ្ឋានមកជួយអន្តរាគមន៍បាញ់ទឹកពន្លត់បន្ទាប់ពីភ្លើងឆេះបន្ទប់អគារកាសុីណូ (ញ៉ូវើល) ដែលសង្ស័យឆ្លងចរន្តអគ្គិសនីនៅក្រុងបាវិត។

យោងតាមសមត្ថកិច្ចកងរាជអាវុធហត្ថ ក្រុងបាវិតបានអោយដឹងនៅថ្ងៃទី២៥ខែឧសភឆ្នាំ២០២៤នេះថា ពិតជាមានករណីឆេះបន្ទប់អគារកាសុីណូ (ញ៉ូវើល)ក្រុងបាវិតមែន ប៉ុន្តែមិនបណ្ដាលអោយមានមនុស្សរងគ្រោះថ្នាក់នោះទេ។

ហេតុការណ៍នេះបានកើតឡើងនៅវេលាម៉ោង១១និង២០នាទីយប់ ថ្ងៃទី២៤ ខែឧសភា ឆ្នាំ២០២៤ នៅចំណុចកាសុីណូ (ញ៉ូវើល) អគារW2 ជាន់ទី១ បន្ទប់លេខ២១៨ (បន្ទប់ស្នាក់នៅរបស់បុគ្គលិក)  ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។ 

ប្រភពបន្តថា បន្ទាប់ពីមានករណីឆាបឆេះ អគារW2 ជាន់ទី១ បន្ទប់លេខ២១៨ (បន្ទប់ស្នាក់នៅរបស់បុគ្គលិក) ភ្លាមៗកម្លាំងសមត្ថកិច្ចកងរាជអាវុធហត្ថ ក្រុងបាវិត បានធ្វើការបាញ់ទឹកពន្លត់បានទាំងស្រុង ដោយប្រើប្រាស់រថយន្តពន្លត់អគ្គិភ័យចំនួន០១គ្រឿង ប្រើប្រាស់ទឹកចំនួន១រថយន្ត កម្លាំងចំនួន១៣នាក់។

ចំពោះសម្ភារមួយចំនួនដូចជា : គ្រែពីរជាន់ចំនួន០៣ គ្រែម៉ាស៊ីនត្រជាក់ ០១គ្រឿង ម៉ាសុីនបោកខោអាវចំនួន០១គ្រឿង ពិតានត្រូវខូចខាតនិងមិនបណ្តាលឱ្យមនុស្សរងរបួសទេ។

សមត្ថកិច្ចបានបញ្ជាក់ថា មូលហេតុដែល បណ្តាលអោយមានអគ្គិភ័យកើតឡើងគឺដោយសារឆ្លងចរន្តអគ្គិសនី៕

ដោយ៖ សុថាន