🔴 Update៖ សមត្ថកិច្ចចាប់ឃាត់ខ្លួនជនល្មើសជាខ្មាន់កាំភ្លើងបានហើយ ក្នុងករណីបាញ់ប្រហារដ៏ឃោរឃៅ បណ្តាលឱ្យមានមនុស្សស្លាប់១នាក់ និងរបួស២នាក់ នៅក្នុងបុរី ប៉េងហួតបឹងស្នោរ

ភ្នំពេញ +ខេត្តកណ្តាល ៖ សមត្ថកិច្ចនគរបាល ចាប់ឃាត់ខ្លួនជនល្មើសជាខ្មាន់កាំភ្លើងបានហើយ ក្នុងករណីបាញ់ប្រហារសម្លាប់មនុស្ស បណ្តាលឱ្យមានមនុស្សស្លាប់១នាក់ និងរបួស១នាក់ នៅក្នុងបុរី ប៉េងហួតបឹងស្នោរ គំរោងទី៧ ស្ថិតក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ។ 

បើតាមសមត្ថកិច្ចបានបញ្ជាក់ឱ្យដឹងថា ៖ ជនដៃដល់ជាខ្មាន់កាំភ្លើង បានព្យាយាមបើកឡានរត់គេចខ្លួនទៅដល់ស្រុកអង្គស្នួល ខេត្តកណ្តល នៅវេលាម៉ោងប្រាមាណ ៦ល្ងាចថ្ងៃដដែលនេះ។  ប៉ុន្តែត្រូវសមត្ថកិច្ចនគរបាលស្រុកអង្គស្នួល ខេត្តកណ្តាល តាមប្រមាញ់ឃាត់ខ្លួនបាន ។

លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានឱ្យដឹងថា ៖ ពិតជាឃាត់ខ្លួនបាន បន្ទាប់ពីមានភិនភាគស្រដៀងនឹងជនដៃដល់តាមរូបភាព ដូច្នេះសមត្ថកិច្ចបានឃាត់ខ្លួន នាំយកមកសាកសួរនៅ អគ្គស្នងការដ្ឋាននគរបាលជាតិ តាមនីតិវិធី។

នៅកន្លែងកើតហេតុ លោកឧត្តមសេនីយ៍ឯក ជួន ណារិន្ទ អគ្គស្នងការរង នគរបាលជាតិ និងជាស្នងការនគរបាលរាជធានីភ្នំពេញ បានប្រាប់អ្នកសារព័ត៌មានជាបឋមថា ៖ អ្វីដែលសុីជម្រៅចាំយើងគិតទៀត ប៉ុន្តែអ្វីដែលសំខាន់យើងចូលរួមសោកស្តាយអំពីការបាត់បង់អាយុជីវិតជនរងគ្រោះ ជាមួយអ្នករបួសធ្ងន់ មិនដឹងថាយ៉ាងមេចទេ ! ខ្ញុំកំពុងឱ្យសមត្ថកិច្ចជំនាញតាមមើល ហើយជាការសោកស្តាយ។ 

លោកស្នងការបន្តថា ៖ រឿងនេះយើងមិនអាចទប់ស្កាត់បានទេ ដោយសារជារឿងករណីឃាតកម្ម ការបាញ់ប្រហារនេះ មិនអាចនិយាយបានថា យើងបានដឹងមុនដើម្បីទប់ស្កាត់ ហើយសមត្ថកិច្ចយើងខ្ញុំសូមទោស និងសោកស្តាយ ។ លោកស្នងការបញ្ជាក់ថា ដល់ម៉ោង៦ល្ងាចនេះ គឺជនរងគ្រោះបានស្លាប់ម្នាក់ដដែល ហើយម្នាក់ទៀតជាស្ត្រីនោះ កំពុងសង្គ្រោះបន្ទាន់ ជាមួយបុរសរងគ្រោះរបួសធ្ងន់ម្នាក់ទៀត។ លោកស្នងការបញ្ជាក់ថា ៖ ជនសង្ស័យជាខ្មាន់កាំភ្លើងបាញ់ផ្ទាល់ មានតែម្នាក់ទេ ! ប៉ុន្តែនៅក្នុងរថយន្តមានប៉ុន្មាន គឺសមត្ថកិច្ចក្នុងប្រតិបត្តិការត្រូវតែគ្រប់គ្រងសិន ហើយជនសង្ស័យគាត់ជាអ្នកចេញចូលនៅហ្នឹង និយាយឱ្យចំទៅគឺថា មុខរបរគាត់ ការរស់នៅរបស់គាត់ វាយតម្លៃជំហានដំបូងនេះ គាត់មិនមែនជាអ្នករស់នៅជាអចិន្ត្រៃយ៍នៅទីនេះទេ ។

សូមបញ្ជាក់ថា ៖ មានករណីបាញ់ប្រហារមួយ បានកើតឡើងត្រង់ចំណុចផ្ទះលេខ២៦ នៃគំរោងទី៧ របស់បុរីប៉េងហួតបឹងស្នោរ ស្ថិតក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ កើតឡើងកាលពីវេលាម៉ោង៣ នឹង៥០នាទីរសៀលថ្ងៃទី១៧ ខែមិថុនា ឆ្នាំ២០២៤ ដែលការបាញ់ប្រហារនេះបណ្តាលឱ្យមនុស្សរងរបួសធ្ងន់២នាក់ និងម្នាក់ទៀតបានស្លាប់ក្នុងថ្លុកឈាម ។ 

តាមការបញ្ជាក់ពីអ្នកជិតខាង ករណីនេះកើតឡើងរឿងទំនាស់ពាក្យសំដី ខណៈជនរងគ្រោះ បានកាប់មេឃស្វាយរបស់ខាងផ្ទះ របស់ជនបង្កដែលមាន២ល្វែង បានធ្លាក់មេឃមកចូលខាងផ្ទះជនរងគ្រោះ បន្ទាប់មកជនដៃដល់ដែលជាម្ចាស់ដើមស្វាយក៏បានទៅសួរនាំ ក៏ក្លាយជាទំនាស់ពាក្យសំដី ឈានដល់ដកកាំភ្លើងបាញ់ប្រហារលើជនរងគ្រោះ បុរសជាគូដណ្តឹង ខាងស្ត្រីរងគ្រោះនោះដែរ ។ ពេលបាញ់ប្រហារមកលើបុរសជាគូដណ្តឹង ស្ត្រីរូបនោះ ក៏បានលើកដៃសំពះអង្វរឱ្យឈប់បាញ់ តែជនដៃដល់មិនព្រមបញ្ឈប់សកម្មភាព ក៏បន្តបាញ់ស្ត្រីជាគូដណ្តឹងនោះបន្ថែមទៀត ទើបខាងប្រុសស្លាប់ក្នុងថ្លុកឈាម ហើយខាងស្រីសន្លប់បាត់ស្មារតីដោយត្រូវគ្រាប់កាំភ្លើង ដេកស្តូកស្តឹងក្រោមតុក្នុងថ្លុកឈាម ហើយបុរសម្នាក់ទៀត ប្រហែលជាជនដៃដល់ខ្លាច មកតដៃ ក៏បានបាញ់សម្លាប់ម្នាក់ទៀត តែត្រូវដៃ បណ្តាលឱ្យរបួសធ្ងន់ អង្គុយនៅមុខផ្ទះដើម្បីឱ្យសមត្ថកិច្ចជួយយកទៅសង្គ្រោះបន្ទាន់ ។ ចំណែកឃាតក បានជិះម៉ូតូម៉ាកស៊ូមើ មានអ្នកបើកឌុបចេញពីកន្លែងកើតហេតុ និងបន្តទៅបើកឡានគេចខ្លួន ប្រមាណជា៣ម៉ោងត្រូវសមត្ថកិច្ចឃាត់ខ្លួននៅ ស្រុកអង្គស្នួល ខេត្តកណ្តាល។ 

ជនរងគ្រោះ ជាម្ចាស់ហាងមេឌៀមួយយ៉ាងល្បីដែលមានឈ្មោះថា ឡុង លីសុង មានយីហោ«Stela Picture » ។ 

បច្ចុប្បន្នជនសង្ស័យចំនួន ៣នាក់ ជាបក្ខពួក ឃាត់ខ្លួនដោយកម្លាំងនគរបាលខណ្ឌច្បារអំពៅ និងចាប់យកបាន រថយន្ត ចំនួន២គ្រឿង ក៏ត្រូវបានបញ្ជូនទៅស្នងការដ្ឋាននគរបាលរាជធានីភ្នំពេញមុននេះបន្តិច ។ ចំណែកជនដៃដល់ជាខ្មាន់កាំភ្លើង ក៏ត្រូវបានសមត្ថកិច្ចនគរបាលខេត្តកណ្តាលបញ្ជូនឱ្យសមត្ថកិច្ចម្ចាស់ករណីយកទៅធ្វើការសាកសួរតាមនីតិវិធី ។ 

សូមជម្រាបជូនថា ៖ បុរីប៉េងហួត មិនសំដៅថា នៅបុរីប៉េងហួតបឹងស្នោទេ គឺមានសន្តិសុខការពារ ២៤ម៉ោងលើ២៤ម៉ោង មាន Camara សុវត្តិភាព មានការរឹតបន្តឹងអ្នកចេញចូលដែលមិនស្គាល់ មិនអនុញ្ញាតឱ្យចូល ប៉ុន្តែសកម្មភាពនេះ ហាក់ដូចជាជនដៃដល់ មានឱកាសធ្វើសកម្មភាពសាហាវម្ល៉េះ ? គប្បីពង្រឹងសន្តិសុខបន្ថែម ដើម្បីជាទំនុកចិត្តដល់អ្នករស់នៅក្នុងបុរី និងអតិថិជនរបស់ខ្លួន ៕ 

ដោយ ៖ រ៉ារ៉ា+សណ្តោស