សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះវិហារ ៖ ផ្ទះនិងផ្លូវមួយចំនួនតាមបណ្តាស្រុកត្រូវជន់លិចដោយសារមានភ្លៀងធ្លាក់ខ្លាំងបន្តបន្ទាប់គ្នាច្រើនថ្ងៃគ្រប់ទិសទីក្នុងខេត្តព្រះវិហារ។
ដូចជាក្រុងព្រះវិហារ និងស្រុកឆែប ប៉ុន្តែអាជ្ញាធរអាចគ្រប់គ្រងស្ថានការណ៍បាននៅឡើយ នេះបើគិតត្រឹមរសៀល ថ្ងៃទី១៥ ខែកក្កដា ឆ្នាំ២០២៤នេះ។
លោក ណុប វុធ្ធី អភិបាលរងខេត្តព្រះវិហារ បានឱ្យដឹងថា នាប៉ុន្មានថ្ងៃនេះខេត្តព្រះវិហារទាំងមូលមានភ្លៀងធ្លាក់ជាប់ៗគ្នា បណ្ដាលឱ្យលិចផ្លូវ និងផ្ទះសម្បែងពលរដ្ឋមួយចំនួនដូចជានៅក្នុងក្រុងព្រះវិហារ និងឃុំកំពង់ស្រឡៅ១.ឃុំសង្កែ១ និងឃុំសង្កែ២ នៃស្រុកឆែប។
លោកបន្តថា ទោះជាយ៉ាងនេះក្តី អាជ្ញាធរមានវិធានការទប់ស្កាត់ កុំឱ្យមានការប៉ះពាល់ដល់ការរស់នៅនិងអាយុជីវិតរបស់ពលរដ្ឋ ដោយអាចនឹងបើកទ្វារទឹកទំនប់រក្សា និងជូនដំណឹងទៅអាជ្ញាធរខេត្តកំពង់ធំ ឱ្យត្រៀមការពារផងដែរ។
លោកបញ្ជាក់ថា បច្ចុប្បន្ននៅក្នុងខេត្តព្រះវិហារទាំងមូលមិនទាន់ដល់កម្រិតប្រកាសអាសន្ននៅឡើយទេ ហើយក៏មិនទាន់មានពលរដ្ឋណាម្នាក់មានបញ្ហាដោយសារជំនន់ទឹកភ្លៀងនេះដែរ។
សរុបគិតជាមធ្យមប្រចាំថ្ងៃ ទទួលបានទឹកភ្លៀងកម្រិត ៨៤,៤៤ មម។
ដោយឡែកបរិមាណទឹកភ្លៀងដោយបូកយោងតាំងពីដើមរដូវ រហូតមកដល់ត្រឹមថ្ងៃទី១៥ ខែកក្កដា ឆ្នាំ ២០២៤ នៅទូទាំងខេត្តព្រះវិហារ ទទួលបានទឹកភ្លៀងសរុបគិតជាមធ្យម ៦៦៣,៧៤ មម។
ក្នុងខណៈនោះដែរមន្ទីរធនធានទឹក និងឧតុនិយមខេត្តព្រះវិហារ ក៏បានអំពាវនាវឱ្យប្រជាពលរដ្ឋយកចិត្តទុកដាក់ និងប្រុងប្រយ័ត្នខ្ពស់ ខណ:ថ្ងៃទី១៥ ដល់ថ្ងៃទី១៨ ខែកក្កដានេះ ស្ថានភាពអាកាសធាតុ ក្នុងខេត្តព្រះវិហារ នឹងមានខ្យល់បោកបក់ខ្លាំង និងមានផ្គររន្ទះពីតិចទៅច្រេីនលេីស កម្រិតធម្មតា។
ហើយក្នុងរយៈពេលមួយថ្ងៃពេញនៅថ្ងៃទី ១៤ ខែកក្កដា ឆ្នាំ២០២៤ក៏មានភ្លៀងធ្លាក់នៅតាមបណ្ដារក្រុង-ស្រុក ទាំង៨ នៃខេត្តព្រះវិហារ រួមមាន៖
– ក្រុងព្រះវិហារ ៧៩ មម
– ស្រុកត្បែង មានជ័យ ១៣២,៦ មម(អាចមានជំនន់ទឹកភ្លៀង)
– ស្រុកគូលែន ២៩ មម
– ស្រុកជាំក្សាន្ត ១២៧,៥ មម(អាចមានជំនន់ទឹកភ្លៀង)
– ស្រុកឆែប ១២០ មម(អាចមានជំនន់ទឹកភ្លៀង)
– ស្រុកជ័យសែន ៤០ មម
– ស្រុករវៀង ៦១,២ មម
– ស្រុកសង្គមថ្មី ៨៦,២ មម
ជាលទ្ធផលប្រចាំថ្ងៃទី១៤ ខែកក្កដាឆ្នាំ២០២៤(២៤ម៉ោង) សរុបគិតជាមធ្យម ប្រចាំថ្ងៃទទួលបានទឹកភ្លៀងកំរិត ៨៤,៤៤ មម ។
បរិមាណទឹកភ្លៀងដោយបូកយោងតាំងពីដើមរដូវ រហូតមកដល់ត្រឹមថ្ងៃទី១៤ ខែកក្កដា ឆ្នាំ ២០២៤ នៅទូទាំងខេត្តព្រះវិហារទទួលបានទឹកភ្លៀងសរុបគិតជា មធ្យម ៦៦៣,៧៤ មម ៕
ដោយ ៖ ជីវ័ន្ត
