សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តស៊េរីទំនើបALPHARDបេីកដោយបុរសជនជាតិចិនម្នាក់ ជ្រុលទៅបុុកនឹងក្បាលនាគថ្មពុះចែកទ្រូងផ្លូវបណ្ដាលឲ្យខ្ទាតអស់១កង់ ព្រមទាំងធ្វើឲ្យរថយន្តរងការខូចខាត ។
ហេតុការណ៍នេះកេីតឡើងនៅវេលាម៉ោង១និង៥០នាទីរំលងអធ្រាត្រឈានចូលថ្ងៃទី២៧ ខែកក្កដា ឆ្នាំ២០២៤ តាមបណ្ដោយផ្លូវសុធារស សង្កាត់ទន្លេបាសាក់ ខណ្ឌចំការមន ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញបុរសជនជាតិចិនម្នាក់ទំនងជាស្រវឹង បើករថយន្តស៊េរីទំនើបម៉ាក TOYOTA ALPHARD ពណ៌ខ្មៅ ពាក់ស្លាកលេខ ភ្នំពេញ 2AZ 0082 បេីកបរតាមបណ្ដោយផ្លូវសុធារសក្នុងទិសដៅពីជើងទៅត្បូង លុះដល់ចំណុចកើតហេតុស្រាប់តែរថយន្តរេចង្កូតទៅបុកនឹងក្បាលនាគថ្មពុះចែកទ្រូងផ្លូវ បណ្តាលឲ្យខ្ទាតរលំអស់ចំនួនមួយកង់ ព្រមទាំងធ្វើឲ្យរថយន្តរងការខូចខាតផ្នែកខាងមុខបាក់កង់មុខខាងឆ្វេង ទៅមុខលែងរួច ក្នុងហេតុការណ៍នេះដែរមិនបង្កឲ្យមានគ្រោះថ្នាក់ដល់មនុស្សនោះទេ អ្នកបើកបរគឺបានចុះគេចខ្លួនទៅបាត់ ។
ក្រោយកើតហេតុនៅសល់តែរថយន្តត្រូវប្រគល់ឲ្យសមត្ថកិច្ចជំនាញចរាចរណ៍ស្ទូចយកទៅរក្សាទុករង់ចាំដោះស្រាយ ៕
ដោយ៖សុខាសែនជ័យ
