សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បើករថយន្តស៊េរីទំនើបម៉ាកឡិចស៊ីស LM350h ខ្វះការប្រុងប្រយ័ត្នបានជ្រុលទៅបុករថយន្តស៊េរីទំនើបម៉ាកBMW i8 ដែលបេីកដោយស្ត្រីម្នាក់នៅផ្លូវបំបែកជាបួន បណ្តាលឱ្យរងការខូចខាតរថយន្តយ៉ាងដំណំ។
ហេតុការណ៍នេះបានកេីតឡើងនៅវេលាម៉ោង១០និង១០នាទីយប់ ថ្ងៃទី២៨ ខែកក្កដា ឆ្នាំ២០២៤ នៅចំណុចផ្លូវលេខ៤៣៦កែងផ្លូវលេខ៩៩ សង្កាត់បឹងត្របែក ខណ្ឌចំការមន ។
តាមប្រភពព័ត៌មានពីកន្លែងកើតហេតុ បានអោយដឹងថា មុនពេលកេីតហេតុគេបានឃើញស្ត្រីម្នាក់បេីករថយន្តស៊េរីទំនើបម៉ាក BMW i8 ពណ៌ស ពាក់ស្លាកលេខភ្នំពេញ 2CC-2881 ធ្វើដំណើរតាមបណ្ដោយផ្លូវលេខ៤៣៦ក្នុងទិសដៅពីកេីតទៅលិច លុះមកដល់ចំណុចកេីតហេតុដែលជាផ្លូវបំបែកជាបួនក៏ស្រាប់តែបុរសម្នាក់បានបើករថយន្តម៉ាក ឡិចស៊ីស LM 350h ពណ៌ខ្មៅ ពាក់ស្លាកលេខភ្នំពេញ 2CB-8611ធ្វើដំណើរតាមបណ្ដោយផ្លូវលេខ៩៩ក្នុងទិសដៅពីជើងទៅត្បូងដោយល្បឿនលឿនហេីយខ្វះការប្រុងប្រយ័ត្នដូចគ្នាក៏ជ្រុលទៅបុករថយន្តBMWយ៉ាងពេញទំហឹង បណ្តាលឱ្យរថយន្តរងការខូចខាតខ្ទេចផែ្នកខាងមុខចំហៀងខាងស្តាំ ។
ដោយឡែកខាងរថយន្តឡិចស៊ីសវិញ រងការខូចខាតខ្ទេចផែ្នកខាងមុខ ផ្ទុះពោងសុវត្ថិភាព តែមិនគ្រោះថ្នាក់ដល់មនុស្សដែលជិះក្នុងរថយន្តដូចគ្នា។
ករណីនេះដែរបន្តិចក្រោយមកក៏មានកម្លាំងសមត្ថកិច្ចមូលដ្ឋាននិងជំនាញចរាចរណ៍ខណ្ឌចំការមនបានទៅដល់កន្លែងកេីតហេតុ ហេីយបានអោយភាគីទាំងសងខាងសម្របសម្រួលគ្នាមួយជំហានសិន។
ក្រោយពេលកេីតហេតុ ភាគីទាំងសងខាងបានសម្របសម្រួលគ្នា ដោយខាងរថយន្តឡិចស៊ីសសុខចិត្តយករថយន្តBMWទៅជួសជុលអោយវិញដេីម្បីបញ្ចប់រឿង៕
ដោយ៖សុខាសែនជ័យ
