🚫សូមប្រុងប្រយ័ត្ន🚫

ភ្នំពេញ ៖ នៅយប់ថ្ងៃទី២ ខែកញ្ញា ឆ្នាំ២០២៤ អង្គភាពនាយកដ្ឋានប្រឆាំងនគរបាលបទល្មើសបច្ចេកវិទ្យា នៃអគ្គស្នងការនគរបាលជាតិ បានបញ្ជាក់ឱ្យដឹងថា ៖ ថ្មីៗនេះ នាយកដ្ឋានប្រឆាំងបទល្មើសបច្ចេកវិទ្យា បានស្រាវជ្រាវឃើញថា មានគណនីតាមបណ្តាញទំនាក់ទំនងសង្គមមួយចំនួន បានបង្ហោះផ្សព្វផ្សាយ និងចែកចាយបន្ត នូវតំណរភ្ជាប់បោកបញ្ឆោត ឬការផ្សាយពាណិជ្ចកម្មបោកបញ្ឆោត អំពីការលក់នាឡិការ Smart Watch S9 ដែលមានតំលៃថោកជាងទីផ្សារច្រើន ក្នុងគោលបំណងបោកបញ្ឆោត និងទាក់ទាញដល់អ្នកប្រើប្រាស់បណ្តាញទំនាក់ទំនងសង្គមខាងលើ ឲ្យមានការចាប់អារម្មណ៍ ដើម្បីធ្វើការបំពេញនូវព័ត៌មានផ្ទាល់ខ្លួន ដែលជាហេតុបណ្ដាលឲ្យជនឆ្លៀតឱកាស អាចយកព័ត៌មានផ្ទាល់ខ្លួននេះ ទៅប្រើប្រាស់ក្នុងគោលបំណងទុច្ចរិតណាមួយ  ឬបន្ទាប់ធ្វើការបញ្ជាទិញរួចរាល់ ហើយពុំទទួលបានឥវ៉ាន់។

នាយកដ្ឋានប្រឆាំងបទល្មើសបច្ចេកវិទ្យា សូមក្រើនរំលឹកដល់សាធារណជនដែលប្រើប្រាស់បណ្តាញសង្គមនានា សូមប្រុងប្រយ័ត្ន និងពិនិត្យអោយបានច្បាស់លាស់ទៅលើការផ្សព្វផ្សាយពាណិជ្ជកម្មអ្វីមួយ កុំជឿការផ្សព្វផ្សាយណាដែលគ្មានប្រភពច្បាស់លាស់ ជៀសវាងខាតបង់ផលប្រយោជន៍ដោយសារការឆបោកតាមប្រព័ន្ធបច្ចេកវិទ្យា ៕

ដោយ ៖ សិលា