សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ គូស្នេហ៍ប្រុសស្រីមួយគូខណៈជិះម៉ូតូខ្វះការប្រុងប្រយ័ត្នត្រង់ផ្លូវបំបែកជាបួនក៏ជ្រុលទៅបុករថយន្តតាក់ស៊ីម៉ាកម៉ាស្តា បណ្តាលឱ្យអ្នកទាំង២រងរបួសធ្ងន់ ។
ហេតុការណ៍នេះបានកេីតឡេីងនៅវេលាម៉ោង១១និង៤០នាទីយប់ ថ្ងៃទី២២ខែវិច្ឆិកាឆ្នាំ២០២៤ នៅក្រោយអតីតក្រសួងដែនដី ផ្លូវលេខ៩៥ កែងផ្លូវលេខ៤៥៦ ក្នុងសង្កាត់បឹងត្របែក ខណ្ឌចំការមន ។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកេីតហេតុគេឃើញបុរសជាអ្នករត់តាក់ស៊ីម្នាក់បានបេីករថយន្តម៉ាក ម៉ាស្តា ពាក់ស្លាកលេខភ្នំពេញ 2BP-8629 ដឹកភ្ញៀវបរទេសម្នាក់ធ្វើដំណើរតាមបណ្ដោយផ្លូវលេខ៤៥៦ក្នុងទិសដៅពីកេីតទៅលិច លុះមកដល់ចំណុចកេីតហេតុដែលជាផ្លូវបំបែកជាបួន ក៏ស្រាប់តែមានបុរសម្នាក់រួមដំណើរជាមួយនឹងនារីម្នាក់ត្រូវជាគូស្នេហ៍នឹងគ្នា បានជិះម៉ូតូម៉ាក ហុងដាឃ្លីក ពណ៌ស ពាក់ស្លាកលេខ ភ្នំពេញ 1LC-1634 ជិះបោះពួយតាមបណ្ដោយផ្លូវលេខ៩៥ក្នុងទិសដៅពីជើងទៅត្បូងដោយល្បឿនលឿនព្រមទាំងខ្វះការប្រុងប្រយ័ត្នក៏ជ្រុលទៅបុករថយន្តពីចំហៀងខាងស្តាំយ៉ាងពេញទំហឹង បណ្តាលឱ្យអ្នកទាំង២ហោះផ្លោងទៅផ្លូវម្ខាងទៀតរងរបួសបាក់ភ្លៅខាងឆ្វេងទាំង២នាក់ ត្រូវបានដឹកតាមរថយន្តសាមុយយកទៅសង្គ្រោះនៅមន្ទីរពេទ្យមិត្តភាពខ្មែរ-សូវៀតហៅពេទ្យរុស្ស៊ីផងដែរ ។
ដោយឡែកខាងរថយន្តវិញរងការខូចខាតក្រពឹតទ្វារមុខចំហៀងខាងស្តាំបែកកង់មុខ តែមិនមានគ្រោះថ្នាក់ដល់មនុស្សដែលជិះក្នុងរថយន្តនោះទេ តែអ្នកបេីកបរត្រូវសមត្ថកិច្ចឃាត់ខ្លួនយកទៅប៉ុស្តិ៍រង់ចាំប្រគល់អោយផ្នែកជំនាញចរាចរណ៍ ។
ក្រោយពេលកេីតហេតុ រថយន្ដនិងម៉ូតូរួមទាំងអ្នកបេីកបរត្រូវសមត្ថកិច្ចជំនាញចរាចរណ៍ធ្វើការវាស់វែងយកទៅរក្សាទុកនៅការិយាល័យនគរបាលចរាចរណ៍ផ្លូវគោកដេីម្បីរង់ចាំដំណោះស្រាយ ៕
ដោយ៖សុខាសែនជ័យ
