សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ យុវជនម្នាក់ជិះម៉ូតូឌុបនារីម្នាក់ក្នុងល្បឿនលឿនគេចពីរថយន្តជ្រុលទៅបុកបង្គោលភ្លើង បោកក្បាលស្លាប់ទាំង២នាក់ភ្លាមៗ។
គ្រោះថ្នាក់ចរាចរណ៍ដ៏រន្ធត់នេះបានបង្កការភ្ញាក់ផ្អើលកាលពីវេលាម៉ោង ១១ និង ២០នាទីយប់ថ្ងៃទី ២៣ ខែវិច្ឆិកា ឆ្នាំ២០២៤ នៅតាមបណ្តោយផ្លូវបេតុង ក្នុងសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។
តាមប្រភព័ត៌មានពីប្រជាពលរដ្ឋបានប្រាប់ឱ្យដឹងថា មុនពេលកើតហេតុ គេឃើញយុវជនប្រុសស្រី០២នាក់ជិះម៉ូតូមួយគ្រឿង ម៉ាក ហុងដាឌ្រីម ពណ៌ខ្មៅ ពាក់ស្លាកលេខ កំពង់ចាម 1AC-0935 បើកបរក្នុងទិសដៅពីជើងទៅត្បូង ខណៈមកដល់ចំណុចកើតហេតុបានជិះម៉ូតូគេចពីរថយន្តក៏ជ្រុលទៅបុកធុងសំរាមនឹងបានបន្តទៅបុកបង្គោលភ្លើងពេញមួយទំហឹង បណ្តាលឱ្យបោកក្បាលស្លាប់ទាំង០២នាក់ភ្លាមៗនៅនឹងកន្លែងកើតហេតុតែម្តង ។
ក្រោយកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ រួចធ្វើការទាក់ទងទៅមន្រ្តីចរាចរណ៍ នៃការិយាល័យចរាចរណ៍ផ្លូវគោកដើម្បីមកវាស់វែងយកម៉ូតូទៅរក្សាទុករង់ចាំដោះស្រាយពេលក្រោយ ។
ចំណែកសពត្រូវបានសមត្ថកិច្ចធ្វើកំណត់ហេតុយកទៅតម្កល់នៅវត្តតាំងក្រសាំង រង់ចាំសាច់ញាតិមកទទួលយកទៅធ្វើបុណ្យតាមប្រពៃណី ៕
ដោយ៖សុខាសែនជ័យ
