អុីរ៉ង់ បាញ់បង្ហោះផ្កាយរណបសម្ងាត់ ចូលទៅក្នុងគន្លងផែនដី

ចែករំលែក៖

អុីរ៉ង់បានបាញ់បង្ហោះដោយជោគជ័យនូវរ៉ុក្កែតអវកាស Simorgh ដែលផ្ទុកបន្ទុកដ៏ធំមិនធ្លាប់មានពីមុនមកក្នុងគន្លងផែនដី រួមទាំងផ្កាយរណបយោធា Fakhr-1 ផងដែរ។
ទីភ្នាក់ងារសារព័ត៌មាន IRNA របស់អុីរ៉ង់ បាននិយាយថា រ៉ុក្កែតអវកាស Simorgh ដែលអភិវឌ្ឍដោយខ្លួនឯង របស់ប្រទេសនេះ ត្រូវបានបាញ់បង្ហោះដោយជោគជ័យ កាលពីថ្ងៃទី៦ ខែធ្នូ (ម៉ោងក្នុងតំបន់) ដោយនាំយកទម្ងន់សរុប ៣០០គីឡូក្រាម ចូលទៅក្នុងគន្លងផែនដីទាប។ នេះក៏ជាបន្ទុកធំបំផុតដែលគ្រាប់រ៉ុក្កែតអវកាសក្នុងស្រុករបស់អ៊ុីរ៉ង់បានដាក់ចូលក្នុងគន្លងដោយជោគជ័យ។
យោងតាម IRNA មានផ្កាយរណបចំនួនបីនៅក្នុងប្លុកផ្ទុកបន្ទុកខាងលើ រួមទាំងផ្កាយរណបយោធា Fakhr-1 ឧបករណ៍ផ្ទេរគន្លង Saman-1 និង “ឧបករណ៍ស្រាវជ្រាវ” ដែលមិនមានការប្រកាស។ ឧបករណ៍ទាំងបីបានបំបែកចេញពី Simorgh ដោយជោគជ័យ ហើយផ្កាយរណប Fakhr-1 បានបញ្ជូនសញ្ញាត្រឡប់មកផែនដីវិញ។
ដាក់ឈ្មោះតាមរូបវិទូ Mohsen Fakhrizadeh ដែលត្រូវបានធ្វើឃាតក្នុងឆ្នាំ ២០២០ នៅទីក្រុង Tehran ផ្កាយរណប Fakhr-1 ត្រូវបានផលិតដោយយោធាអុីរ៉ង់ មានម៉ាស់ត្រឹមតែ ១០ គីឡូក្រាមប៉ុណ្ណោះ ហើយត្រូវបានរចនាឡើងដើម្បីសាកល្បងបច្ចេកវិទ្យាសម្រាប់ផ្តល់សេវាវេជ្ជសាស្រ្តពីគន្លងផែនដី ។
ទន្ទឹមនឹងនេះ ឧបករណ៍ផ្ទេរគន្លង Saman-1 ត្រូវបានគេពិពណ៌នាថាមានសមត្ថភាព “ទាញ” ផ្កាយរណបផ្សេងទៀតពីគន្លងទាបទៅគន្លងខ្ពស់ជាង ដោយជួយអុីរ៉ង់បង្កើនសមត្ថភាពរបស់ខ្លួនក្នុងការដាក់ពង្រាយផ្កាយរណបនៅរយៈកម្ពស់ខុសៗគ្នានាពេលអនាគត។
ទោះបីជាមានសម្ពាធពីទណ្ឌកម្មរបស់លោកខាងលិចក៏ដោយ ក៏អុីរ៉ង់នៅតែបង្ហាញឱ្យឃើញថា ខ្លួនមានសមត្ថភាពដណ្តើមយកគោលដៅអវកាស ជាមួយនឹងឧបករណ៍ក្នុងស្រុក។ នៅក្នុងខែមករា ឆ្នាំ 2024 អុីរ៉ង់បានបាញ់បង្ហោះរ៉ុក្កែត Simorgh booster ដោយជោគជ័យ ដើម្បីដាក់ផ្កាយរណបចំនួន 3 ចូលទៅក្នុងគន្លងផែនដី៕