សារព័ត៌មាន នគរវត្ត តែងតែនាំមុខគេជានិច្ច
ប៉ូលិសថៃបានចាប់ខ្លួនជនសង្ស័យពីរនាក់បន្ទាប់ពីការបំផ្ទុះគ្រាប់បែកនៅឯពិធីបុណ្យប្រចាំឆ្នាំមួយនៅក្នុងខេត្ត Tak។
ទីភ្នាក់ងារព័ត៌មាន AP បានដកស្រង់ព័ត៌មានពីអាជ្ញាធរក្នុងតំបន់ដែលនិយាយថា ការបំផ្ទុះគ្រាប់បែកមួយបានកើតឡើងនៅក្នុងពិធីបុណ្យមួយក្នុងទីក្រុង Umphang ខេត្ត Tak ភាគខាងជើងប្រទេសថៃកាលពីយប់ថ្ងៃទី ១៣ ខែធ្នូ និងព្រឹកព្រលឹមថ្ងៃទី ១៤ ខែធ្នូ។
ការផ្ទុះនេះបានសម្លាប់មនុស្សយ៉ាងតិច៣នាក់ និងរបួស៣៩នាក់ផ្សេងទៀត ។ ទន្ទឹមនឹងនេះ ប្រភពខ្លះបាននិយាយថា ចំនួនអ្នករងរបួសឡើងដល់ជិត ៥០នាក់។
យោងតាមសមាគម Umphang នៃក្រុមជួយសង្គ្រោះ គ្រឿងផ្ទុះមួយត្រូវបានគេបោះចូលទៅក្នុងហ្វូងមនុស្សអំឡុងពេលសម្តែងនៅខាងក្រៅពិធីបុណ្យនៅព្រំដែនជាមួយប្រទេសមីយ៉ាន់ម៉ា។
អ្នកនាំពាក្យក្រសួងការពារជាតិថៃ លោក Thanathip Sawangsang បានប្រាប់សារព័ត៌មាន Associated Press ថា ប៉ូលិសក្នុងតំបន់បាននិយាយថា មានការប្រយុទ្ធគ្នារវាងក្រុមគូប្រជែង មុនពេលមានការផ្ទុះ។ ភស្តុតាងធ្វើកោសល្យវិច័យបានបង្ហាញថា គ្រឿងផ្ទុះនោះជាគ្រាប់បែកច្នៃ។ ប៉ូលិសបានចាប់ខ្លួនជនសង្ស័យពីរនាក់ ប៉ុន្តែអត្តសញ្ញាណជនសង្ស័យមិនត្រូវបានគេបញ្ចេញទេ។
នាយករដ្ឋមន្ត្រីថៃ លោកស្រី Paetongtarn Shinawatra បានបញ្ជាឱ្យប៉ូលិស និងភ្នាក់ងារសន្តិសុខ ស៊ើបអង្កេតឧប្បត្តិហេតុនេះឱ្យបានលឿន និងពង្រឹងវិធានការសន្តិសុខ មុនពេលពិធីបុណ្យនាពេលខាងមុខ ដើម្បីធានាសុវត្ថិភាពប្រជាជន៕ ដោយ៖ ធីរីណា
រូបថត៖ independent
