សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសវ័យចំណាស់ម្នាក់ជិះម៉ូតូឆ្លងផ្លូវត្រូវយុវជនម្នាក់ជិះមកបុកពេញទំហឹងបណ្តាលឲ្យដួលបោកក្បាលស្លាប់ភ្លាមៗនៅនឹងកន្លែងកើតហេតុ ចំណែកយុវជនដែលបង្កបានរត់គេចខ្លួនបាត់ស្រមោលទុកម៉ូតូចោលនៅកន្លែងកើតហេតុ ។
ហេតុការណ៍បានកេីតឡេីងកាលពីវេលាម៉ោង១២ យប់រំលងអធ្រាត្រឈានចូល ថ្ងៃទី២២ ខែធ្នូ ឆ្នាំ២០២៤ ស្ថិតតាមបណ្ដោយផ្លូវ៥០ម៉ែត្រ សង្កាត់ព្រៃស ខណ្ឌដង្កោ រាជធានីភ្នំពេញ។
បើតាមប្រភពពីកន្លែងកើតហេតុបានឲ្យដឹងថា មុនពេលកើតហេតុគេបានឃើញ បុរសចំណាស់ម្នាក់ជិះម៉ូតូម៉ាក HONDA CLICK ពណ៌ខ្មៅ ពាក់ស្លាកលេខ ភ្នំពេញ 1HD-5661 ធើ្វដំណើរតែម្នាក់ឯងចេញពីផ្លូវលំ គោលបំណងឆ្លងផ្លូវឡើងមកលើផ្លូវ៥០ម៉ែត្រ ខណៈមកដល់ចំណុចកើតហេតុស្រាប់តែមានយុវជនម្នាក់ជិះម៉ូតូម៉ាក SUZUKI NEX ពណ៌សលាយខៀវពាក់ផ្លាកលេខ ភ្នំពេញ 1ID-8542 ក្នុងល្បឿនលឿន បុកពេញទំហឹងបណ្ដាលឲ្យម្ចាស់ម៉ូតូ HONDA CLICK បោកក្បាលស្លាប់ បន្ទាប់ពីបង្កគ្រោះចរាចរណ៍រួចមានស្រី្តម្នាក់បានមកដល់កន្លែងកើតហេតុ សង្ស័យជាម្ដាយបាន ជម្លៀសយុវជនខាងលើឲ្យចេញពីកន្លែងកើតហេតុបាត់ស្រមោលទាំង២នាក់ ដោយទុកម៉ូតូចោលនៅកន្លែងកើតហេតុ។
ក្រោយពេលកេីតហេតុសមត្ថកិច្ចជំនាញចរាចរណ៍ផ្លូវគោកនៃអធិការដ្ឋាននគរបាលខណ្ឌដង្កោចុះមកធ្វើការវាស់វែងយកម៉ូតូទាំងពីរគ្រឿងទៅរក្សាទុករង់ចាំការដោះស្រាយនៅពេលក្រោយ។ ចំណែកឯសពជនរងគ្រោះប្រគល់ឲ្យសាច់ញាតិយកទៅធ្វេីបុណ្យតាមប្រពៃណី ៕
ដោយ ៖ សុខាសែនជ័យ
