សារព័ត៌មាន នគរវត្ត តែងតែនាំមុខគេជានិច្ច
កីឡាករបម្រុង Alexander Sorloth បានស៊ុតបញ្ចូលទីគ្រាប់ជ័យជម្នះក្នុងម៉ោងបន្ថែម ខណៈដែលក្រុមភ្ញៀវ Atletico Madrid បានវាយបកយកឈ្នះម្ចាស់ផ្ទះ Barcelona ដើម្បីជួយ ពួកគេនៅលើកំពូលតារាង La Liga ក្នុងការប្រកួតកាលពីរំលងអធ្រាត្រឈានចូលថ្ងៃទី២២ ខែធ្នូនេះ។
Pedri បានបើកការស៊ុតបញ្ចូលទីនាំមុខសម្រាប់ក្រុមម្ចាស់ផ្ទះ Barcelona នៅនាទីទី៣០ ដោយមានការបញ្ជូនបាល់យ៉ាងល្អពីខ្សែបម្រើអេស្ប៉ាញ Gavi ស៊ុតផុតដៃអ្នកចាំទី Jan Oblak។
ថ្វីត្បិតតែមានភាពប្រសើរឡើងសម្រាប់ក្រុមម្ចាស់ផ្ទះក្នុងតង់ទី១ក៏ដោយ ក្រុមម្ចាស់ផ្ទះមិនអាចទប់បាន ឡើយក្នុងការប្រកួតតង់ទី២ ដោយកីឡាករ Rodrigo De Paul បានស៊ុតបាល់តាមស្មើនៅនាទីទី៦០ បន្ទាប់ពីកំហុសរបស់ Marc Casado។
Barcelona ត្រូវបានទុកឱ្យបាត់បង់ឱកាសបន្ថែមទៀតនៅពេល Sorloth បានរកគ្រាប់បាល់ជ័យជម្នះពីការបញ្ជូនរបស់ Nahuel Molina នៅនាទីទី៩០+៦នៃម៉ោងបន្ថែម ដើម្បីឱ្យ Atletico Madrid ទទួលជ័យជម្នះជាលើកទី១២ជាប់គ្នាក្នុងគ្រប់ការប្រកួតទាំងអស់។
ជ័យជម្នះនេះមានន័យថា Atletico Madrid នឹងបញ្ចប់ឆ្នាំ២០២៤ ក្នុងនាមជាក្រុមកំពូលតារាងក្នុងប្រទេសអេស្ប៉ាញ មាន៣ពិន្ទុលើស Barcelona ដែលបានលេងមួយប្រកួតច្រើនជាង។ ក្រុម Barcelona របស់លោក Hansi Flick អាចនឹងធ្លាក់ទៅលេខ៣ ប្រសិនបើ Real Madrid យកឈ្នះ Sevilla នៅថ្ងៃអាទិត្យនេះ។
Barcelona បាននាំមុខ១០ពិន្ទុលើក្រុម Atletico Madrid កាលពីដើមខែវិច្ឆិកា ប៉ុន្តែទម្រង់លេងមិនល្អ និងការឈ្នះជាច្រើនលើកសម្រាប់ក្រុមរបស់លោក Diego Simeone បានមើលឃើញថា Atletico Madrid យកឈ្នះគូប្រជែងរបស់ពួកគេ។
Atletico Madrid បានប្រជែងគ្នាដោយមានពិន្ទុជាមួយនឹងក្រុមម្ចាស់ផ្ទះ Barcelona ដោយដឹងថា ការទទួលជ័យជម្នះនេះនឹងធ្វើឱ្យពួកគេឈានចូលដល់ឆ្នាំ២០២៥ក្នុងនាមជាក្រុមកំពូលតារាង La Liga។ នេះគឺជាក្រុមល្អបំផុតទីពីរក្នុងឆ្នាំនេះ ហើយ Atletico Madrid ត្រូវប្រជែងដើម្បីយកឈ្នះ Barcelona ដែលជាជ័យជម្នះលើកដំបូងចាប់តាំងពីឆ្នាំ២០០៦ ក្នុងការប្រកួតក្រៅទឹកដីរបស់ខ្លួន។
ក្រុម Barcelona ដែលឥឡូវនេះបានចាញ់ការប្រកួតលីក៣លើកចុងក្រោយរបស់ខ្លួននៅក្នុងទឹកដីខ្លួនឯងបានស្រឡាំងកាំងនៅពេលដែល Sorloth ស៊ុតបញ្ចូលទីក្នុងម៉ោងបន្ថែម ហើយការអបអរសាទររបស់ Atletico Madrid បានបន្តនៅពេលដែលសំឡេងកញ្ចែរបស់អាជ្ញាកណ្តាលបញ្ចប់ការប្រកួត។
លទ្ធផលនេះធ្វើឲ្យក្រុម Atletico Madrid ឡើងឈរកំពូលតារាង La Liga មាន៤១ពិន្ទុក្នុង១៨ប្រកួត ខណៈ Barcelona ឈរលេខ២ មាន៣៨ពិន្ទុក្នុង១៩ប្រកួត។ ចំណែក Real Madrid កំពុងឈរលេខ៣ មាន៣៧ពិន្ទុក្នុង១៧ប្រកួតនឹងធ្វើជាម្ចាស់ផ្ទះប៉ះក្រុមភ្ញៀវ Sevilla នៅរាត្រីនេះ ហើយបើសិនជា Real Madrid ឈ្នះនោះនឹងឡើងទៅឈរលេខ២បណ្តោះអាសន្នលើ Barcelona ៕
ដោយ៖ ភារៈ(រូបភាព ៖ BBC)
