សារព័ត៌មាន នគរវត្ត តែងតែនាំមុខគេជានិច្ច
ប្រទេសថៃ៖ យោងតាមការចុះផ្សាយរបស់ Bangkok Post នៅថ្ងៃទី១ ខែមករា ឆ្នាំ២០២៥ បាននិយាយថា៖ អាជ្ញាធរថៃ បានប្រកាសអាសន្ន ដាក់ស្រុកចំនួន៥ក្នុងខេត្ត Tak នៃព្រំដែនភាគខាងជើង ចូលជាតំបន់ក្រហម ដើម្បីទប់ស្កាត់ការឆ្លងរាលដាល ដោយសារតែហានិភ័យឆ្លងជំងឺអាសន្នរោគពីប្រទេសមីយ៉ាន់ម៉ា ត្បិតថាពេលនេះស្ថានការណ៍ហាក់គ្រប់គ្រងបាន រីឯករណីឆ្លងនៅមីយ៉ាន់ម៉ា ក៏កំពុងថយចុះគួរឲ្យកត់សម្គាល់ក៏ដោយ។
Bangkok Post បាននិយាយបញ្ជាក់ថា ស្រុកចំនួន៥ក្នុងខេត្ត Tak ដែលដាក់ចូលជាតំបន់ក្រហមទាំងនោះមានដូចជា៖ Mae Sot, Mae Ramat, Phop Phra, Tha Song Yang និង Umphang។
ជាមួយគ្នានោះ លោកវេជ្ជបណ្ឌិត Ramet Wongwilairat នាយកមន្ទីរពេទ្យ Mae Sot លើកឡើងជុំវិញរឿងនេះថា ត្បិតស្ថានការណ៍មិនធ្ងន់ធ្ងរក៏ដោយ ប៉ុន្តែមានហានិភ័យនៃករណីថ្មីនាពេលអនាគត។
ដោយឡែកមន្ត្រីតាមដានសុខភាពសាធារណៈ បានបញ្ជាក់ថា គិតត្រឹមពេលនេះ មន្ទីរពេទ្យ Mae Sot រកឃើញអ្នកឆ្លងជំងឺអាសន្នរោគចំនួន៤ករណី ក្នុងនោះមានថៃ២នាក់ និងមីយ៉ាន់ម៉ា ២នាក់ ប៉ុន្តែបានព្យាបាលឲ្យជាសះស្បើយរួចហើយ។
សូមជម្រាបជូនថា ត្បិតតែមីយ៉ាន់ម៉ា ហាក់ធូរស្រាលបន្តិចពីជំងឺអាសន្នរោគក៏ពិតមែន ប៉ុន្តែបើតាមរបាយការណ៍ពីឆ្មាំព្រំដែនថៃបានឲ្យដឹងថា គិតចាប់ពីថ្ងៃទី១ដល់២៧ខែធ្នូឆ្នាំ២០២៤ ក្រុង Shwe Kokko មានការឆ្លងជំងឺនេះ៧៦១ករណី ដែលតម្រូវឲ្យចូលព្យាបាលក្នុងមន្ទីរពេទ្យ។
អាសន្នរោគ គឺជាជំងឺឆ្លងដោយបាក់តេរី Vibrio cholerae ដែលបណ្តាលឲ្យបាត់បង់ជាតិទឹកក្នុងរាងកាយ ដោយសាររាកខ្លាំង ហើយអាចឈានស្លាប់ ប្រសិនបើព្យាបាលមិនទាន់ពេល។ ជំងឺនេះភាគច្រើន ឆ្លងតាមការទទួលទានទឹកឬអាហារដែលមានបាក់តេរីនេះ។ វិធីដើម្បីបង្ការអាសន្នរោគ គឺត្រូវរក្សាអនាម័យខ្ពស់ ផឹកទឹកនិងទទួលទានអាហារឆ្អិនល្អ ប្រើបង្គន់ស្អាត និងលាងដៃដោយសាប៊ូ៕
ដោយ៖ តារា
