សារព័ត៌មាន នគរវត្ត តែងតែនាំមុខគេជានិច្ច
ពលករបរទេសប្រហែល២ម៉ឺន៤ពាន់ (24,000) នាក់បានចាកចេញពីប្រទេសហ្វីលីពីន បន្ទាប់ពីកាស៊ីណូអនឡាញ ដែលភាគច្រើនផ្គត់ផ្គង់ដល់អតិថិជននៅក្រៅប្រទេសបានបិទទ្វារយោងទៅតាមការផ្លាស់ប្តូរគោលនយោបាយរបស់រដ្ឋាភិបាល។
យោងតាមរបាយការណ៍របស់ Nikkei Asia បានឱ្យដឹងថា ការិយាល័យអន្តោប្រវេសន៍គឺជាអ្នកផ្តល់ទិន្នន័យរបស់ បុគ្គលិកបរទេសដែលរងផលប៉ះពាល់ដោយការហាមប្រាមឱ្យចាកចេញពីប្រទេស។
រដ្ឋាភិបាលហ្វីលីពីនកាលពីខែកក្កដា បានបញ្ជាឱ្យប្រតិបត្តិករកាស៊ីណូអនឡាញទាំងអស់បិទនៅចុងឆ្នាំ ចំពេលមានការរិះគន់ថា ឧស្សាហកម្មនេះមានទំនាក់ទំនងទៅនឹងសកម្មភាពឧក្រិដ្ឋកម្ម។
មជ្ឈមណ្ឌលដ៏ធំបំផុតរបស់ប្រទេសសម្រាប់ប្រតិបត្តិករលេងល្បែងអនឡាញ កោះខូវ ក្នុងខេត្ត Cavite ត្រូវបានបិទកាលពីថ្ងៃទី 17 ខែធ្នូ ដោយរោងចក្រទំហំ 33 ហិកតានេះ បានផ្តល់ការងារដល់កម្មកររហូតដល់ 30,000 នាក់។
ប្រតិបត្តិករហ្គេមអនឡាញត្រូវបានផ្តល់អាជ្ញាប័ណ្ណក្នុងឆ្នាំ 2016 ក្នុងអំឡុងពេលនៃការគ្រប់គ្រងរបស់ប្រធានាធិបតី Rodrigo Duterte នាពេលនោះ។
កាស៊ីណូទាំងនេះ ដែលផ្តោតជាចម្បងទៅលើអតិថិជនជនជាតិចិន ក៏បានទាក់ទាញកម្មករចិនមួយចំនួនធំមកកាន់ប្រទេសនេះផងដែរ។
ទីភ្នាក់ងារព័ត៌មាន Reuters បានរាយការណ៍ថា នៅពេលមានការផ្ទុះខ្លាំងបំផុតក្នុងវិស័យល្បែងអនឡាញនោះ មានប្រតិបត្តិករចំនួន 300 នាក់ ប៉ុន្តែដោយសារតែមានជំងឺរាតត្បាតកូវិដ១៩ និងច្បាប់ពន្ធកាន់តែតឹងរ៉ឹងបានបង្ខំឲ្យអ្នកបើកបនល្បែងអនឡាញជាច្រើនផ្លាស់ប្តូរទីតាំងនិងបិទប្រតិបត្តិការតែម្តង។
គិតត្រឹមខែកក្កដា មានតែក្រុមហ៊ុនចំនួន 42 ប៉ុណ្ណោះដែលដំណើរការដោយមានអាជ្ញាប័ណ្ណ ផ្តល់ការងារដោយផ្ទាល់ និងដោយប្រយោលប្រហែល 63,000 នាក់ ក្នុងនោះរួមទាំងពលករហ្វីលីពីន និងបរទេស។
យោងតាមទិន្នន័យរបស់រដ្ឋាភិបាលបានឱ្យដឹងថា ប្រាក់ចំណូលរបស់ឧស្សាហកម្មល្បែងស៊ីសងរបស់ប្រទេសហ្វីលីពីនត្រូវបានគេព្យាករណ៍ថានឹងឈានដល់កំណត់ត្រាច្រើនជាង 350 ពាន់លានប៉េសូ (6.03 ពាន់លានដុល្លារ) នៅឆ្នាំនេះ ដែលជំរុញដោយកំណើននៅក្នុងវិស័យហ្គេមអេឡិចត្រូនិក៕
ដោយ៖ ភារៈ
