សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ ស្នងការដ្ឋាននគរបាលខេត្តកំពង់ស្ពឺ នៅព្រឹកថ្ងៃចន្ទទី០៦ ខែមករា ឆ្នាំ២០២៥នេះ បានឱ្យដឹងថា មុខសញ្ញាជួញដូរគ្រឿងញៀនចំនួន ០៦នាក់ ត្រូវបានកម្លាំងនគរបាលជំនាញស្រុកសំរោងទង និងស្រុកកងពិសី បេីកប្រតិបត្ដិការបង្រ្កាបករណីគ្រឿងញៀនបាន ០៤ករណីផ្សេងគ្នា ដោយអនុវត្តបទបញ្ជាលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ ដាច់ខាតមិនត្រូវឲ្យក្រុមជនទុច្ចរឹតយកកំពង់ស្ពឺជាទីកន្លែងចែកចាយសារធាតុញៀន ពង្វក់ស្មារតីយុវជន និងប្រជាពលរដ្ឋក្នុងខេត្តកំពង់ស្ពឺ !
ជាក់ស្ដែងកងកម្លាំងបានអនុវត្ដតាមបទបញ្ជាដ៏ក្ដៅគគុក និងការដឹកនាំបញ្ជាផ្ទាល់ពីលោកឧត្ដមសេនីយ៍ត្រី ម៉ាត់ ធុច ស្នងការរង ទទួលផែនការងារ ប្រឆាំងបទល្មើសគ្រឿងញៀន បានចង្អុលណែនាំដល់ ការិយាល័យជំនាញ ប្រឆាំងបទល្មេីសគ្រឿងញៀន អធិការដ្ឋាននគរបាល ក្រុង-ស្រុក ទាំង០៩ បន្ដបេីកយុទ្ធនាការបង្រ្កាបក្រុមគ្រឿងញៀនអោយប្រែពីភូមិ ប្រផេះ មកជាភូមិ ស និងបន្ដសហការជាមួយ គណៈកម្មការគ្រឿងញៀន ឃុំ សង្កាត់ ប្ដេជ្ញា មិនត្រូវទុកអោយបទល្មេីសនេះបន្ដរីករាលដាលជាជម្ងឺមហារីកបានជាដាច់ខាត ។
គួរបញ្ជាក់ថា ក្នុងរយៈពេល០២ថៃ្ងកន្លងមកនេះ កម្លាំងអធិការដ្ឋាននគរបាលស្រុកសំរោងទង បេីកប្រតិបត្ដិការបង្រ្កាបបាន ០៣ករណី ឃាត់មុខសញ្ញា បាន ០៥នាក់ ដកហូតវត្ថុតាងមួយចំនួន។ ជាមួយគ្នានេះកម្លាំងអធិការដ្ឋាននគរបាលស្រុកគងពិសី ក៏បានស្រាវជ្រាវបង្រ្កាបបានមួយករណី ឃាត់មុខសញ្ញា ម្នាក់ដកហូតវត្ថុតាងមួយចំនួន ជនសង្ស័យនិងវត្ថុតាងបានបញ្ជូនទៅការិយាល័យ ប្រឆាំងបទល្មេីសគ្រឿងញៀន ដេីម្បីចំណាត់ការនីតិវិធីផ្លូវច្បាប់បន្ដ៕
ដោយ៖ តារា
