សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មន្ត្រីនគរបាលជានាយរងប៉ុស្តិ៍នគរបាលស្ទឹងមានជ័យទី២ម្នាក់ជិះម៉ូតូចាប់ហ្វ្រាំងដួលចូលក្រោមរថយន្តធុនធំកិនបណ្តាលឲ្យធ្លាយខួរស្លាប់យ៉ាងអាណោចអាធ័ម ។
ហេតុការណ៍នេះបានកេីតឡេីងនៅវេលាម៉ោង៧យប់ថ្ងៃទី២ខែមីនា ឆ្នាំ២០២៥ ទល់មុខហាងរាត្រីមនោរម្យ ផ្លូវបេតុងទួលពង្រ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ។
ជនរងគ្រោះមានឈ្មោះ ស៊ុយ សុផាត ភេទប្រុសអាយុ៥៥ឆ្នាំ មុខរបរ មន្ត្រីនគរបាល ឋានន្តរសក្ដិ នាយរងប៉ុស្តិ៍ការពារគោលដៅទី២ មានអាសយដ្ឋាន ផ្ទះលេខ១៣៣អឺ0 ផ្លូវលំ សង្កាត់ស្ទឹងមានជ័យ ខណ្ឌមានជ័យ ។
ដោយឡែកអ្នក បេីកបរដោយ ឈ្មោះ វិត សុខុន ភេទប្រុស អាយុ៣១ឆ្នាំ មុខរបរ បើកបររថយន្ត មានទីលំនៅ ភូមិស្តុក ឃុំចេក ស្រុកគងពិសី ខេត្តកំពង់ស្ពឺ (ត្រូវបានសមត្ថកិច្ចឃាត់ខ្លួន) ។
តាមប្រភពព័ត៌មាន ពីកន្លែងកើតហេតុ បានឲ្យដឹងថា មុនពេលកេីតហេតុ គេបានឃើញបុរសរងគ្រោះបានជិះម៉ូតូធុនធំម៉ាកSL ពណ៌ទឹកប្រាក់ ពាក់ស្លាកលេខ ភ្នំពេញ 1CI 3033 ជិះធ្វើដំណើរតាមបណ្ដោយផ្លូវបេតុងទួលពង្រ ទិសដៅពីកេីតទៅលិច លុះមកដល់ចំណុចកេីតហេតុ បានជិះវ៉ាជែងរថយន្ដ តែសង្ស័យអកសឺជាមួយរថយន្តមួយគ្រឿងទៀតមកខាងមុខ ក៏ស្រាប់តែអ្នកជិះម៉ូតូ បានចាប់ហ្រ្វាំងទាំងបង្ខំ បណ្តាលឲ្យម៉ូតូដួលខ្ទាតមនុស្សចូលក្រោមរថយន្តសណ្តោងធុនធំម៉ាក ហ៊ីយ៉ាន់ដាយ ពណ៌បៃតង ពាក់ស្លាកលេខ ព្រះសីហនុ 3A 0944 ដែលបេីកដោយបុរសម្នាក់ធ្វើដំណើរក្នុងទិសដៅស្របគ្នា កិនធ្លាយខួរស្លាប់យ៉ាងអាណោចអាធ័មនៅកន្លែងកេីតហេតុតែម្តងទៅ ។
ដោយឡែករថយន្តវិញបង្កគ្រោះថ្នាក់ហើយបានបេីកទៅមុខប្រហែល១០០ម៉ែត្រ ក៏បានឈប់រថយន្តបម្រុងរត់គេចតែត្រូវបានពលរដ្ឋដេញឃាត់បានប្រគល់ឲ្យសមត្ថកិច្ចតែម្ដង ។
ក្រោយកេីតហេតុ សមត្ថកិច្ចជំនាញចរាចរណ៍បានចុះទៅកន្លែងកេីតហេតុ រួចហើយក៏ធ្វើការទំនាក់ទំនងសាច់ញាតិរបស់ជនរងគ្រោះមកទទួលយកសពទៅធ្វេីបុណ្យតាមប្រពៃណី។ ចំណែកមធ្យោបាយរួមទាំងអ្នកបេីកបរត្រូវបានសមត្ថកិច្ចជំនាញចរាចរណ៍ក្រុងចុះទៅធ្វើការវាស់វែងយកទៅការិយាល័យចរាចរណ៍ផ្លូវគោកដេីម្បីចាត់ការតាមនីតិវិធី ៕
ដោយ៖សុខាសែនជ័យ
