សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ធ្វើសកម្មភាពលួចម៉ូតូនឹងទូរស័ព្ទរបស់ជនរងគ្រោះ គេចខ្លួនរយៈពេល៣ថ្ងៃម្ចាស់តាមរកឃេីញនៅតាមផ្លូវ ស្រាប់តែជនសង្ស័យ ភ័យស្លន់ស្លោបានរត់គេចចូលទៅក្នុងប្រឡាយលូទឹកស្អុយ គេចខ្លួនបាត់ស្រមោល ។
ហេតុការណ៍នេះបង្កឲ្យមានការភ្ញាក់ផ្អើលឡេីងនៅម៉ោង១រំលងអធ្រាត្រឈានចូលថ្ងៃទី៦ ខែមីនា ឆ្នាំ២០២៥ ចំណុចស្ពានដែកចំការដូង ផ្លូវ២១៧ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។
ប្រភពព័ត៌មានពីជនរងគ្រោះសុំមិនបញ្ចេញឈ្មោះ បានឲ្យដឹងថា ម៉ូតូរបស់គាត់ ម៉ាកហុងដាស្តុបពីស៊េរីឆ្នាំ២០២០ និងទូរស័ព្ទម៉ាកiphone១១ មួយគ្រឿងបានបាត់ រយៈពេល៣ថ្ងៃមកហើយនៅម្តុំលូ៥ ខណ្ឌមានជ័យ ។
ប្រភពដដែលបានបន្តទៀតថា ពួកគាត់ជាម្ចាស់របស់ក៏បានទៅដាក់ពាក្យបណ្ដឹងរួចរាល់ហើយដែរ និងបានស្គាល់ភិនភាគជនសង្ស័យផងដែរ លុះមកដល់វេលារំលងអធ្រាត្រថ្ងៃទី៦ ខែមីនា ឆ្នាំ២០២៥ ពួកគាត់បានប្រទះឃើញជនសង្ស័យ ដេីរនៅម្តុំផ្លូវលេខ៣៧១ បានជិះម៉ូតូដេញតាមធ្វើឲ្យជនសង្ស័យភ័យស្លន់ស្លោ បានលោតទំលាក់ខ្លួនពីលើស្ពានដែកចំការដូង ចូលទៅក្នុងប្រឡាយលូទឹកស្អុយ តែម្ដងទៅ ហើយពេលនោះពួកគាត់ជាជនរងគ្រោះ បានដេញតាមដែរ តែតាមមិនទាន់ ព្រោះជនសង្ស័យបានរត់ចូលតាមលូបាត់ស្រមោលតែម្តងទៅ ។
បន្ទាប់ពីកេីតហេតុដោយសាររកមិនឃើញជនសង្ស័យ ប្រជាពលរដ្ឋ និងជនរងគ្រោះជាម្ចាស់របស់បានបំបែកផ្លូវគ្នាទៅផ្ទះរៀងៗខ្លួន ៕
ដោយ៖ ជ្រោយពេជ្រ
