ដាណឺម៉ាក ព្រមានសង្រ្គាម ប្រសិនបើអាមេរិក បញ្ចូលហ្គ្រីនឡែន

ចែករំលែក៖

មន្ត្រីដាណឺម៉ាកបានព្រមានថា ផែនការរបស់ប្រធានាធិបតី Donald Trump ក្នុងការបញ្ចូលតំបន់ Greenland អាចនាំឱ្យមានសង្គ្រាមរវាងសហរដ្ឋអាមេរិក និងដាណឺម៉ាក។នៅក្នុងការបង្ហោះនៅលើបណ្តាញសង្គម X កាលពីថ្ងៃទី 14 ខែមីនា ប្រធានគណៈកម្មាធិការការពារជាតិដាណឺម៉ាក លោក Rasmus Jarlov បាននិយាយថា ប្រទេសដាណឺម៉ាកមិន “កោតសរសើរចំពោះអគ្គលេខាធិការអង្គការណាតូដែលនិយាយលេងជាមួយលោក Trump អំពី Greenland បែបនេះទេ” ។
លោក Jarlov បានព្រមានថា “នោះនឹងមានន័យថាសង្គ្រាមរវាងប្រទេសទាំងពីរ” លោក Jarlov បានរំលឹកថាប្រទេសដាណឺម៉ាកបានបដិសេធម្តងហើយម្តងទៀតក្នុងការពិចារណាបោះបង់ការគ្រប់គ្រងលើ Greenland ។
ក្នុងអំឡុងពេលជួបជាមួយអគ្គលេខាធិការអង្គការណាតូ លោក Mark Rutte កាលពីថ្ងៃទី 13 ខែមីនា នៅពេលអ្នកសារព័ត៌មានសួរអំពី “ចក្ខុវិស័យរបស់គាត់អំពីលទ្ធភាពនៃការបញ្ចូលហ្គ្រីនឡែន” ប្រធានាធិបតី Donald Trump បាននិយាយថា “ខ្ញុំគិតថាវានឹងកើតឡើង” ។
ប្រធានាធិបតី Trump ជឿជាក់ថានេះគឺជាការចាំបាច់ “សម្រាប់សន្តិសុខអន្តរជាតិ” ។ ខណៈពេលដែលអគ្គលេខាធិការ Rutte មិនគាំទ្រគំនិតនេះ លោកបានទទួលស្គាល់ថា លោកប្រធានាធិបតី Trump គឺ “ត្រឹមត្រូវ” ក្នុងការលើកឡើងពីការព្រួយបារម្ភផ្នែកសន្តិសុខនៅក្នុងតំបន់អាក់ទិក ដោយលើកឡើងពីវត្តមានកាន់តែច្រើនឡើងរបស់រុស្ស៊ី និងចិននៅក្នុងតំបន់។
លោក Rutte ក៏បានសង្កត់ធ្ងន់លើសារៈសំខាន់នៃបណ្តាប្រទេសលោកខាងលិច “ធ្វើសកម្មភាពរួមគ្នាលើបញ្ហានេះក្រោមការដឹកនាំរបស់សហរដ្ឋអាមេរិក” ។
នៅក្នុងការបង្ហោះមួយ លោក Jarlov បាននិយាយថា លទ្ធភាពនៃ Greenland ដែលត្រូវបានបញ្ចូលដោយសហរដ្ឋអាមេរិកគឺ “មិនអាចទៅរួចទេ” ហើយសេណារីយ៉ូបែបនេះ “អាចសម្រេចបានលុះត្រាតែសហរដ្ឋអាមេរិកបានឈ្លានពានផ្នែកយោធា” ៕ ដោយ៖ ធីរីណា