សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ សាររំលែកមរណទុក្ខ និងការថ្លែងអំណរគុណចំពោះការចូលរួមរំលែកទុក្ខនៃអ្នកនយោបាយដែលមាននិន្នាការផ្សេងគ្នា គឺជាកាយវិការដ៏គួរឱ្យលើកទឹកចិត្ត។
លោក ហ៊ុន ម៉ានី ដែលជាកូនប្រុសពៅរបស់សម្ដេច ហ៊ុន សែន បានសរសេរនៅគណនីហ្វេសប៊ុកផ្ទាល់ខ្លួនបង្ហាញសេចក្ដីថ្លែងអំណរគុណដល់គណបក្សកម្លាំងជាតិដែលបានបង្ហោះសាររំលែកមរណទុក្ខ និងបង្ហាញសេចក្ដីក្រៀមក្រំចំពោះចំពោះការបាត់បង់អ្នកឧកញ៉ា ហ៊ុន សាន ដែលជាបងប្រុសច្បងរបស់សម្ដេច ហ៊ុន សែន។
គេអាចឃើញខ្លឹមសារដែលលោក ម៉ានី បានសរសេរនៅលើគណនីហ្វេសប៊ុករបស់លោកយ៉ាងដូច្នេះ៖«តាមរយៈលិខិតចូលរួមរំលែកទុក្ខខាងលើ ក្នុងនាមក្រុមគ្រួសារនៃសព ខ្ញុំសូមថ្លែងអំណរគុណដល់គណបក្ស កម្លាំងជាតិដែលបានចែករំលែកសាររំលែកទុក្ខ សម្រាប់ឯកឧត្តម អ្នកឧកញ៉ា ឧត្តមមេត្រីវិសិដ្ឋ ហ៊ុន សាន ដែលត្រូវជាអ៊ំប្រុសបង្កើតរបស់ខ្ញុំ។ សារជាថ្មីក្នុងនាមក្រុមគ្រួសារ ខ្ញុំសូមអរគុណសម្រាប់សាររំលែកទុក្ខ។»។
ក្រៅពីគណបក្សកម្លាំងជាតិ គេក៏បានឃើញប្រតិភូនៃគណបក្សភ្លើងទៀន និងគណបក្សឆន្ទៈខ្មែរ ដែលជាគូរប្រកួតនយោបាយបានចូលរួមក្នុងពិធីបុណ្យសពរបស់អ្នកឧកញ៉ា ហ៊ុន សាន ផងដែរ។
លោក ហ៊ុន ម៉ានី ធ្លាប់បានបង្ហាញគំនិតរបស់លោកថា «មិនមែនអ្វីៗទាំងអស់ សុទ្ធតែជានយោបាយនោះទេ។»
តំណាងគណបក្ស កម្លាំងជាតិ បានសម្តែងនូវសមានទុក្ខ អាឡោះអាល័យ និងក្តីសង្វេគជាពន្លឹក និងសូមចូលរួមរំលែកទុក្ខដ៏កៀមក្រំជាមួយ សម្តេចអគ្គមហាសេនាបតីតេជោ ហ៊ុន សែន ព្រមទាំងក្រុមគ្រួសារញាតិមិត្តបងប្អូនសាច់សាលោហិត។ មរណភាពរបស់ ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន គឺជាការបាត់បង់បងប្រុស ឪពុក ជីតាជាទីស្រលាញ់ ប្រកបដោយសង្គហធម៌ដ៏ឧត្តុង្គឧត្តម និងជាកុលបុត្រខ្មែរដ៏ឆ្នេីមមួយរូបដែលមានមនសិការស្នេហាជាតិ មោះមុត បូជាកម្លាំងកាយចិត្ត ប្រាជ្ញាស្មារតី ក្នុងការចូលរួមយ៉ាងសកម្មក្នុងចលនារំដោះជាតិពីរបបប្រល័យពូជសាសន៍ និងបានរួមចំណែកជាមួយរាជរដ្ឋាភិបាលកម្ពុជា ក្នុងបុព្វហេតុជាតិ សាសនា ព្រះមហាក្សត្រ ដោយបានចួលរួមកសាង ការពារ និងរក្សានូវសន្តិភាព ស្ថិរភាព ឯកភាពជាតិ សេដ្ឋកិច្ច និងការអភិវឌ្ឍលេីគ្រប់វិស័យ។ គំរូវីរភាពដ៏ថ្លៃថ្លា របស់ ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន នឹងត្រូវកុលបុត្រខ្មែរគ្រប់ជំនាន់ចងចាំជានិច្ច។
តំណាងគណបក្សកម្លាំងជាតិ សូមឧទ្ទិសបួងសួងជូនវិញ្ញាណក្ខន្ធរបស់ ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន បានអញ្ជេីញទៅចាប់បដិសន្ធិក្នុងសុគតិភពកុំបីឃ្លៀងឃ្លាតឡេីយ៕
ដោយ ៖ សិលា
