សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ សហរដ្ឋអាមេរិកបានចុះហត្ថលេខាលើកិច្ចព្រមព្រៀងជាមួយអ៊ុយក្រែនដើម្បីទទួលបានផលប្រយោជន៍រួមគ្នានៃធនធានថាមពល និងរ៉ែរបស់ខ្លួន បន្ទាប់ពីមានការចរចាដ៏តានតឹងជាច្រើនខែ។
ប្រទេសទាំងពីរបានព្រមព្រៀងគ្នាបង្កើតមូលនិធិវិនិយោគកសាងឡើងវិញ ដើម្បីជំរុញសេដ្ឋកិច្ចអ៊ុយក្រែនងើបឡើងវិញពីសង្គ្រាមជាមួយរុស្ស៊ី។
រដ្ឋមន្ត្រីក្រសួងរតនាគារសហរដ្ឋអាមេរិក Scott Bessent បាននិយាយថា ខ្លួនបានបង្ហាញថាភាគីទាំងពីរបានប្តេជ្ញាចិត្តចំពោះសន្តិភាពយូរអង្វែង និងវិបុលភាពក្នុងប្រទេសអ៊ុយក្រែន។ សម្រាប់ទីក្រុង Kyiv កិច្ចព្រមព្រៀងនេះត្រូវបានគេមើលឃើញថាមានសារៈសំខាន់ក្នុងការទទួលបានជំនួយយោធារបស់សហរដ្ឋអាមេរិក។ អ៊ុយក្រែនត្រូវបានគេជឿថាមានទុនបម្រុងដ៏ច្រើននៃសារធាតុរ៉ែសំខាន់ៗដូចជាក្រាហ្វិត ទីតានីញ៉ូម និងលីចូម។
រ៉ែទងនោះត្រូវបានស្វែងរកយ៉ាងខ្លាំងសម្រាប់ការប្រើប្រាស់នៅក្នុងថាមពលកកើតឡើងវិញ កម្មវិធីយោធា និងហេដ្ឋារចនាសម្ព័ន្ធឧស្សាហកម្ម។
កិច្ចព្រមព្រៀងនេះកើតឡើងចំពេលមានសង្រ្គាមពាណិជ្ជកម្មអាមេរិកជាមួយចិន ដែលមានផ្ទុករ៉ែកម្ររហូត 90% នៃពិភពលោកពេលបច្ចុប្បន្ន។
យោងតាមសេចក្តីថ្លែងការណ៍របស់រតនាគារសហរដ្ឋអាមេរិកនៅរសៀលថ្ងៃពុធ មូលនិធិវិនិយោគកសាងឡើងវិញរបស់សហរដ្ឋអាមេរិក-អ៊ុយក្រែនដែលទើបបង្កើតថ្មីទទួលស្គាល់ “ជំនួយផ្នែកហិរញ្ញវត្ថុ និងសម្ភារៈដ៏សំខាន់” ដែលសហរដ្ឋអាមេរិកបានផ្តល់ឱ្យអ៊ុយក្រែនចាប់តាំងពីប្រទេសរុស្ស៊ីបានឈ្លានពានក្នុងខែកុម្ភៈឆ្នាំ 2022 ។
ឧបនាយករដ្ឋមន្ត្រីអ៊ុយក្រែន Yulia Svyrydenko ដែលបានហោះទៅទីក្រុងវ៉ាស៊ីនតោន ដើម្បីចុះហត្ថលេខាលើកិច្ចព្រមព្រៀងកាលពីថ្ងៃពុធ បាននិយាយនៅក្នុងការបង្ហោះនៅលើ X ថាមូលនិធិថ្មីនឹង “ទាក់ទាញការវិនិយោគជាសកលមកក្នុងប្រទេសរបស់យើង” ។ ដោយរាយបញ្ជីបទប្បញ្ញត្តិនៃកិច្ចព្រមព្រៀងនេះ លោកស្រីបាននិយាយថា វានឹងពាក់ព័ន្ធនឹងគម្រោងក្នុងវិស័យរ៉ែ ប្រេង និងឧស្ម័ន ទោះបីជាធនធាននឹងនៅតែជាកម្មសិទ្ធិរបស់អ៊ុយក្រែនក៏ដោយ។ លោកស្រីបានបន្ថែមថា ភាពជាដៃគូនឹងមានភាពស្មើគ្នានៅលើមូលដ្ឋាន 50:50 ហើយត្រូវតែផ្តល់សច្ចាប័នដោយសមាជិកសភានៅទីក្រុង Kyiv ។ លោកស្រីបានបន្ថែមថា នៅក្រោមកិច្ចព្រមព្រៀងនេះ សហរដ្ឋអាមេរិកនឹងផ្តល់ជំនួយថ្មីដល់ទីក្រុង Kyiv ដោយលោកស្រីបានបន្ថែមថា រួមទាំងប្រព័ន្ធការពារដែនអាកាសផងដែរ៕
ដោយ៖ ធីរីណា
