រថយន្ត៣គ្រឿងបុកបន្តកន្ទុយគ្នា បង្កជាអគ្គិភ័យឆាបឆេះយ៉ាងសន្ធោសន្ធៅ នៅលើផ្លូវក្រវាត់ក្រុងទី៣

ខេត្តកណ្តាល ៖ រថយន្ត៣គ្រឿងបុកបន្តកន្ទុយគ្នា បង្កជាអគ្គិភ័យឆាបឆេះយ៉ាងសន្ធោសន្ធៅ ដោយសារមានតែរថយន្តឡិចសុីស៤៧០ មួយគ្រឿងឈប់ខូចនៅលើផ្លូវ រួចមានរថយន្តមួយគ្រឿងទៀតមកឈប់ចតខាងក្រោយដើម្បីជួសជុល ស្រាប់តែមានរថយន្ត ១គ្រឿងទៀតម៉ាក អាល់ហ្វាត (alphard) ពណ៌ស បើកបរស្របទិសគ្នា មកបុកពីក្រោយរថយន្តស្តារិចបន្តទៀត ដែលជាហេតុបង្កឱ្យមានអគ្គិភ័យឆាបឆេះតែម្ដង។

​ហេតុការណ៍នេះ​ ​កាលពីម៉ោង៨:២០​នាទី​យប់​ ថ្ងៃ​ទី​១៤​ ខែ​ឧសភា​ ឆ្នាំ​២០២៥ដែល​ស្ថិត​នៅ​តាម​បណ្ដោយ​ក្រវាត់​ក្រុង​ទី៣​ ជិត​ដល់​ព្រលាន​យន្តហោះ​ថ្មី​ ក្រុង​តាខ្មៅ​ ខេត្ត​កណ្ដាល​ ​។

តាមសមត្ថកិច្ចបានឱ្យដឹងថា មុនកើតហេតុ មានរថយន្តមួយគ្រឿងម៉ាកឡិចសុីស ៤៧០ បានឈប់ខូចនៅលើផ្លូវ រួចមានរថយន្តមួយគ្រឿងទៀតមកឈប់ចតខាងក្រោយដើម្បីជួសជុល លុះដល់ម៉ោងកើតហេតុស្រាប់តែមានរថយន្ត ១គ្រឿងទៀតម៉ាក អាល់ហ្វាត (alphard) ពណ៌ស ពាក់ផ្លាកលេខ ភ្នំពេញ2BC-2558 បើកបរដោយឈ្មោះ ឡោ គឹមសឿន ភេទប្រុស អាយុ ៣៨ឆ្នាំ មានទីលំនៅភូមិរកាទី១ ឃុំរកាជន្លឹង ស្រុកខ្សាច់កណ្ដាល ខេត្តកណ្ដាល បើកបរស្របទិសគ្នាក្នុងល្បឿនលឿនហ្វ្រាំងមិនទាន់ ជ្រុលបុកពីក្រោយទើបបង្កជាអគ្គិភ័យឆាបឆេះសន្ធោសន្ធៅឡើង។

បន្ទាប់ពីកើតហេតុភ្លាមៗ សមត្ថកិច្ចបានហៅរថយន្តពន្លត់អគ្គិភ័យចំនួន២គ្រឿង ចេញទៅអន្តរាគមន៍បាញ់ទឹកពន្លត់ភ្លើង។ ជុំវិញអគ្គិភ័យខាងលើ បានខូចខាតរថយន្តចំនួន៣គ្រឿង តែមិនបង្កឱ្យអ្នកណារងរបួស ហើយសមត្ថកិច្ចបានស្ទូចយករថយន្តទាំង៣គ្រឿងទៅរក្សាទុក រង់ចាំដោះស្រាយតាមនីតិវិធី ៕

ដោយ៖ ជ្រោយពេជ្រ