លំនៅ​ឋាន​ដ៏​ធំ​មួយ​ខ្នងនៅក្រុងបាត់ដំបង ត្រូវ​អគ្គិភ័យ​លេប​ត្របាក់អស់​គ្មាន​សល់ រួម​ទាំង​ទ្រព្យសម្បត្តិ​

ខេត្តបាត់ដំបង ៖ លំនៅ​ឋាន​ដ៏​ធំ​មួយ​ខ្នង ត្រូវ​អគ្គិភ័យ​លេប​ត្របាក់​យក​អស់​គ្មាន​សល់ រួម​ទាំង​ទ្រព្យសម្បត្តិ​ផង កាលពី​វេលា​ម៉ោង​០៣​និង​៣៥​នាទី​រសៀល​ថ្ងៃ​ទី​០៥ ខែកក្កដា​នេះ នៅ​ចំណុច​ភូមិ​សូ​ភី​២ សង្កាត់​រតនៈ ក្រុង​បាត់ដំបង តែ​ពុំ​មាន​គ្រោះថ្នាក់​ដល់​មនុស្ស​ទេ ។

មន្ត្រី​ពន្លត់​អគ្គិភ័យ រាយ​ការណ៍ថា លំនៅ​ឋាន​ដែល​ត្រូវ​ភ្លើង​ឆេះ​អស់​គ្មាន​សល់​នោះ ធ្វើ​ពី​ថ្ម​ក្រោម ឈើ​ខាងលើ និង​ប្រក់​ស័ង្កសី មាន​ទំហំ ៦​ម៉ែត្រ គុណ​៩​ម៉ែត្រ ដែល​មានឈ្មោះ អឿ ហាន ស្រី​អាយុ​៦២​ឆ្នាំ ជា​ម្ចាស់ផ្ទះ ។

មន្ត្រី​ដដែល​បាន​ប្រាប់​ថា បើ​តាម​ការ​អះអាង​ពី​ម្ចាស់ផ្ទះ អគ្គិភ័យ​ដ៏​កាច​សាហាវ​នេះ ផ្ដើម​ចេញពី​ការ​ឆ្លង​ចរន្តអគ្គិសនី ហើយ​បាន​ឆាបឆេះ​យ៉ាង​លឿន​បំផុត ជា​ហេតុ​ធ្វើ​ឲ្យ​ម្ចាស់ផ្ទះ និង​អ្នក​ភូមិ មិន​អាច​ជួយ​រំដោះ​សម្ភារៈ ឬ​អីវ៉ាន់​នៅ​ក្នុង​បាន​ឡើយ ។

រថយន្ត​ពន្លត់​អគ្គិភ័យ​របស់​សមត្ថកិច្ច​ចំនួន​០២​គ្រឿង បាន​ចេញ​អន្តរា​គមគម៍ភ្លាម​ៗ តែ​បាន​ត្រឹមតែ​ជួយ​បាញ់​ទប់ស្កាត់ មិន​ឲ្យ​ឆ្លង​រាលដាល​ប៉ុណ្ណោះ ព្រោះ​អគ្គិភ័យ​បាន​ឆេះ​លឿន​ពេក ៖ នេះ​បើ​តាម​មន្ត្រី ដែល​ចុះ​ជួយ​អន្តរា​គម​ន៍និយាយ​ពី​កិច្ច​ប្រតិបត្តិការ​ជួយ​សង្គ្រោះ ។

បើ​តាម​សមត្ថកិច្ច បាន​និយាយ​បន្ត​ថា មាន​របស់របរ​តិចតួច​ណាស់ ដែល​ជន​រង​គ្រោះ និង​ប្រជាពលរដ្ឋ​បាន​ជួយ​រំដោះ​ផុត​ពី​ចំណី​ភ្លើង ក្រៅពី​នោះ ក្លាយជា​ផេះ​ទាំង អស់​។ ប៉ុន្តែ​ភ្លាម​ៗ​នោះ គេ​មិន​ទាន់​ដឹង​ពី​ទំហំ នៃ​ការ​ខាតបង់​នៅឡើយ​ទេ ព្រោះ​មន្ត្រី​ជំនាញ និង អាជ្ញាធរ កំពុងធ្វើការ​សួរនាំ​ជន​រង​គ្រោះ​។ យ៉ាងណា​ក្ដី បើ​តាម​សមត្ថកិច្ច បាន​រាយ​ការ​ណ៏​បឋម​ថា ក្រៅពី​ខូចខាត​អស់​ផ្ទះ​មួយ​ខ្នង​ទាំងស្រុង សម្ភារៈ និង​ទ្រព្យសម្បត្តិ​ផ្សេង​ៗ​ទៀត ក៏​ក្លាយជា​ផេះ​គ្មាន​សល់​ដែរ៕

ដោយ៖ សូរិយា