រថយន្តកុងតឺន័របោះពួយបុកសសរស្ពានផ្លូវល្បឿនលឿន ស្លាប់អ្នកបើកបរ និងអ្នករួមដំណើររបួសធ្ងន់

ខេត្តកំពង់ស្ពឺ៖ បុរសអ្នកបើកបររថយន្តបានស្លាប់ភ្លាមៗនៅកន្លែងកើតហេតុ និងស្ត្រីម្នាក់ទៀតដែលរួមដំណើរបានរងរបួសធ្ងន់ត្រូវបានដឹកបញ្ជូនយកទៅសង្គ្រោះព្យាបាលនៅមន្ទីរពេទ្យភ្លាមៗ ខណៈដែល បុរសខាងលើបើករថយន្តកុងតឺន័រ លឿនដូចហោះ បោះពួយយ៉ាងលឿនបុកជាមួយសសរស្ពានផ្លូវល្បឿនលឿនពេញ ទំហឹង បង្កឱ្យមានការភ្ញាក់ផ្អើលដល់អ្នកធ្វើដំណើរនិងសមត្ថកិច្ច។

ហេតុការណ៍រថយន្តកុងតឺន័របោះពួយយ៉ាងលឿនបុកសសរស្ពានផ្លូវល្បឿនលឿនបានកើតឡើងកាលពីវេលាម៉ោង ១០និង៣០នាទីព្រឹកថ្ងៃទី៣ ខែមិថុនា ឆ្នាំ២០២៦ នៅលើកំណាត់ផ្លូវជាតិលេខ៤ ចន្លោះបង្គោលគីឡូម៉ែត្រលេខ(៩៩-ទៅលេខ១០០) ស្ថិតនៅក្នុងភូមិទី៦ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ។

នគរបាលស្រុកភ្នំស្រួចបានឱ្យដឹងថា នៅមុនពេលកើត ហេតុ មានរថយន្តកុងតឺន័រ១គ្រឿងម៉ាកFUSO ពណ៌ខៀវ ពាក់ផ្លាកលេខភ្នំពេញ3E-9488 សណ្តោងសឺមីរ៉ឺម៉កពាក់ផ្លាកលេខព្រះសីហនុ4A-1210 បើកបរដោយឈ្មោះ មី សាវ៉ាត ភេទប្រុសអាយុ៣៣ឆ្នាំ រស់នៅក្នុងភូមិកំព្រាល ឃុំប្រឡាយ ស្រុកស្ទោង ខេត្តកំពង់ធំ អ្នកជិះក្នុងរថយន្ដ ភេទស្រី មិនទាន់ស្គាល់អត្តសញ្ញាណ(បានរងរបួសធ្ងន់) រថយន្តកុងតឺន័របានបើកបរតាមបណ្ដោយ ផ្លូវជាតិលេខ៤ពីទិសខាងលិចទៅទិសខាងកើត ។

ពេលធ្វើដំណើរមកដល់ចំណុចកើតហេតុខាងលើ បានរេចង្កូតមកខាងស្តាំដៃ ធ្លាក់ផ្លូវបុកសសរស្ពានផ្លូវល្បឿនលឿន បណ្តាលឲ្យកៀបស្លាប់តៃកុងរថយន្តឈ្មោះ (មី សាវ៉ាតចំណែកអ្នករួមដំណើររងរបួសធ្ងន់ត្រូវបានរថយន្តដឹកយកទៅសង្គ្រោះព្យាបាលនៅមន្ទីរពេទ្យភ្លាមៗ។

នគរបាលស្រុកភ្នំស្រួចបានបន្តឱ្យដឹងទៀតថា ក្រោយកើតហេតុនគរបាលបានចុះវាស់វែង, រងការខូចខាតរថយន្ត០១គ្រឿង កំរិតធ្ងន់ ខូចខាតសសរស្ពាផ្លូវល្បឿនលឿន ចំនួន០៣ដើម និងរងការ ខូចខាតទុយោទឹកស្អាត ប្រវែង៥ម៉ែត្រផងដែរ។

នគរបាលស្រុកភ្នំស្រួចបានបញ្ជាក់ថាករណីខាងលើនេះមិនមានការកកស្ទះចរាចរណ៍ធ្វើដំណើរនោះទេ។ នគរបាលជំនាញបានចាត់ចែងស្ទូចរថយន្តកុងតឺន័រខាងលើយកទៅរក្សាទុកនៅអធិការដ្ឋាននគរបាលស្រុកភ្នំស្រួច រង់ចាំធ្វើដោះស្រាយ និង ចាត់ការតាមផ្លូវច្បាប់៕