សារព័ត៌មាន នគរវត្ត តែងតែនាំមុខគេជានិច្ច
សារព័ត៌មានយុនហាប់របស់កូរ៉េខាង ត្បូងបានដកស្រង់សម្តីមន្ត្រីកូរ៉េខាងត្បូង ដែលកំពុងបំពេញទស្សនកិច្ចទៅកាន់ទី ក្រុងវ៉ាស៊ីនតោន (មិនបញ្ចេញឈ្មោះ) បានបញ្ជាក់ថា ការណ៍ដែលកូរ៉េខាងជើងសាកល្បងអាវុធទំនើប ជាសញ្ញាមួយ បង្ហាញឲ្យឃើញថា រដ្ឋាភិបាលទីក្រុង ព្យុងយ៉ាង អាចនឹងបោះបង់ចោលកិច្ច ពិភាក្សាស្តីពីបរមាណូជាមួយអាមេរិក ក្រោយកិច្ចពិភាក្សាមិនមានភាពរីកចម្រើន ហើយអាមេរិកមិនផ្តល់ទំនុកចិត្តដល់កូរ៉េខាងជើង។
ប៉ុន្តែវាឆាប់រហ័សពេក ក្នុងការវាយ តម្លៃពីសកម្មភាពរបស់ទីក្រុងព្យុងយ៉ាងឲ្យបានច្បាស់ថានេះជាការសម្រេចផ្លាស់ប្តូរ របស់មេដឹកនាំកូរ៉េខាងជើងឈប់ពិភាក្សាជាមួយអាមេរិក។ តាមការវាយតម្លៃជារួម កូរ៉េខាងជើងនៅតែចង់ពិភាក្សាជាមួយ អាមេរិក ដើម្បីបញ្ចប់កម្មវិធីបរមាណូ ដោះដូរនឹងការលុបទណ្ឌកម្មសេដ្ឋកិច្ច។
នៅក្នុងការសាកល្បងអាវុធទំនើបថ្មីនេះ មេដឹកនាំ គីម ជុងអ៊ុន បានទៅត្រួត ពិនិត្យដោយផ្ទាល់។
សារព័ត៌មានរដ្ឋកូរ៉េខាងជើង កាលពីថ្ងៃ ទី១៦ ខែវិច្ឆិកា បានផ្សាយថា កូរ៉េខាងជើង បានសាកល្បងអាវុធ “ដ៏ទំនើបបំផុតទើប អភិវឌ្ឍថ្មី” នៅក្នុងការបាញ់សាកល្បង មួយត្រូវបានត្រួតពិនិត្យមើលដោយមេដឹកនាំ គីម ជុងអ៊ុន ស្របពេលដែលមាន ដំណើរការរអាក់រអួលដល់កិច្ចចរចាលើ ការរំសាយអាវុធនុយក្លេអ៊ែររបស់ទីក្រុង ព្យុងយ៉ាងជាមួយសហរដ្ឋអាមេរិក។
ទោះបីជាយ៉ាងណាក៏ដោយ គេបាន ដឹងតិចតួចប៉ុណ្ណោះ ពីសមត្ថភាពអាវុធ មួយប្រភេទនេះ ឬថាតើវាជាអាវុធថ្មី ឬ យ៉ាងណា ប៉ុន្តែការសាកល្បងរបស់វា គឺជា សញ្ញាចុងក្រោយមួយបញ្ជាក់ថា ទីក្រុង ព្យុងយ៉ាងបានត្រៀមខ្លួនរួចរាល់ក្នុងការ វិលត្រឡប់មកកាន់ទំនាក់ទំនងយោធា និយមជាមួយទីក្រុងវ៉ាស៊ីងតោន ប្រសិន បើកិច្ចប្រជុំមិនទទួលបានលទ្ធផលជាផ្លែផ្កាទេនោះ។
លោក ចូស ប៉ូលែក គឺជាអ្នកស្រាវជ្រាវជាន់ខ្ពស់មួយរូបនៅឯវិទ្យាស្ថានសិក្សាអន្តរជាតិ Middlebury ដែលមានមូលដ្ឋាននៅ ទីក្រុងម៉ុនតេរី ប្រទេសម៉ិកស៊ិក បាន និយាយប្រាប់ CNN ថាលោក គីម ជុងអ៊ុន កំពុងដើរឆ្ពោះទៅរកកាយវិការដ៏គឃ្លើន ជាងមុននៅក្នុងកិច្ចចរចាជាមួយសហរដ្ឋ អាមេរិក ហើយលោកបានបង្ហាញយ៉ាង ច្បាស់ថា លោកនឹងមិនបើកផ្លូវនោះទេ ហើយលោកអាចនឹងងាកមករកប្រតិបត្តិការចាស់របស់លោកដដែល បើសិនជា សហរដ្ឋអាមេរិក មិនផ្លាស់ប្តូរដំណោះ ស្រាយរបស់ពួកគេទេនោះ។
ទីភ្នាក់ងារព័ត៌មានរដ្ឋកូរ៉េខាងជើង KCNA បានប្រកាសការសាកល្បងអាវុធបំពាក់ដោយបច្ចេកវិទ្យាដ៏ទំនើបនេះ កាល ពីព្រឹកថ្ងៃសុក្រ ប៉ុន្តែពួកគេមិនបានបរិយាយយ៉ាងលម្អិតពីទីតាំងនៃការសាកល្បង ឬព័ត៌មានពាក់ព័ន្ធនឹងសមត្ថភាពអាវុធ មួយប្រភេទនេះនោះទេ៕ ម៉ែវ សាធី
