ស្លាប់ និងរងរបួសច្រើននាក់ ក្នុងហេតុការណ៍ផ្ទុះរោងចក្រផលិតរថយន្តនៅចិន

ការផ្ទុះរោងចក្រផលិតគ្រឿងយន្ត នៅខេត្ត Jinlin សារជាថ្មីម្តងទៀត ធ្វើឲ្យគេគិតដល់ពីសុវត្ថិភាព ការងារនៅតាមបណ្តាក្រុមហ៊ុនធំៗ ទូទាំងប្រទេសចិន ចាប់តាំងពី មានហេតុការណ៍ផ្ទុះនៅកំពង់ផែ Tianjin បំផ្លាញទ្រព្យសម្បត្តិ និងអាយុជីវិតមនុស្សជាច្រើន ។

គិតមកដល់ពេលនេះ មានមនុស្ស ២នាក់ស្លាប់ និង ២៤នាក់រងរបួស នៅក្នុងហេតុការណ៍ផ្ទុះរោងចក្រ ផលិតរថយន្ត នៅក្នុងប្រទេសចិន ។ កម្លាំងជំនាញ កំពុងបើកការស្រាវជ្រាវពីមូលហេតុបណ្តាលឲ្យមានគ្រោះថ្នាក់ខាងលើកើតឡើង។

សារព័ត៌មាន Sputnik បានផ្សាយថា ហេតុការណ៍ផ្ទុះខាងលើ កើតឡើងនៅវេលាម៉ោង២៣និង៤០នាទី ថ្ងៃទី២៣ ខែវិច្ឆិកា (ម៉ោងក្នុងតំបន់) ស្ថិតនៅក្នុងស្រុក Dongfangខេត្តJilin ប្រទេសចិន ។ នៅពេលមានហេតុការណ៍ផ្ទុះកើតឡើង មានមនុស្សជាច្រើននៅក្នុងរោងចក្រ ។ ក្រុមពន្លត់អគ្គិភ័យជាង ២២០នាក់បានទៅដល់កន្លែងកើតហេតុភ្លាមៗ ដើម្បីគ្រប់គ្រងស្ថានភាព ហើយក្រុមគ្រូពេទ្យ ជាង៨០នាក់ ក៏បានទៅកាន់កន្លែងកើតហេតុ ដើម្បីសង្គ្រោះបន្ទាន់អ្នករងរបួស ។

នៅក្នុងសេចក្តីប្រកាស មន្ត្រីរដ្ឋាភិបាលនៅក្នុងតំបន់ បានឲ្យដឹងថា គិតមកទល់ពេលនេះ មានមនុស្ស ២នាក់ស្លាប់ និង ២៤នាក់រងរបួស បានបញ្ជូនទៅព្យាបាលនៅក្នុងមន្ទីរពេទ្យ ក្រោយការផ្ទុះបង្កឲ្យមានគ្រោះអគ្គិភ័យជាទ្រង់ទ្រាយធំនៅក្នុងរោងចក្រ ។

សារព័ត៌មាន China Daily បានផ្សាយថា ហេតុការណ៍ផ្ទុះខាងលើ កើតឡើងនៅក្នុងរោងចក្រ ផលិតរថយន្ត Jiangcheng។ ផ្ទះដល់ទៅ៤១ខ្នង នៅក្បែរនោះ រងការខូចខាត ដោយសារតែកម្លាំងផ្ទុះខ្លាំងពេក ។

បច្ចុប្បន្នស្ថានភាពត្រូវបានគ្រប់គ្រង ហើយមន្ត្រីជំនាញកំពុងបើកការស្រាវជ្រាវ ដើម្បីស្វែងរកមូលហេតុពិតប្រាកដ ។ ប៉ុន្តែលទ្ធផលនៃការស្រាវជ្រាវជាបឋម គឺមិនមែនជាការវាយប្រហារភេរវកម្មនោះឡើយ គឺជាគ្រោះថ្នាក់តែប៉ុណ្ណោះ។

តាមតួលេខផ្លូវការ ចិនមានពលរដ្ឋ ជិត ១,៤ពាន់លាននាក់ ប៉ុន្តែមានកម្លាំងពន្លត់អគ្គិភ័យ ស្ថិតនៅក្របខណ្ឌរដ្ឋ មានតែ ១៥០.០០០នាក់ប៉ុណ្ណោះ និង ១១៥.៨០០នាក់ ធ្វើការតាមបែប កុងត្រា ។ ចំនួនក្រុមពន្លត់អគ្គិភ័យគឺនៅមានតិចជាង អាមេរិក ដែលមានពលរដ្ឋតែជាង៣០០លាននាក់ប៉ុណ្ណោះ ។ អាមេរិក មានក្រុមពន្លត់អគ្គិភ័យមានរហូតដល់ទៅជាង៣សែននាក់ ដែលមានប្រាក់ខែដល់ទៅ៤៨.៧៥០ ដុល្លារ ក្នុងមួយខែ ៕ ម៉ែវ សាធី