សារព័ត៌មាន នគរវត្ត តែងតែនាំមុខគេជានិច្ច
កម្លាំងទាហានរដ្ឋាភីបាលហ្វីលីពីន និងក្រុមឧទ្ទាម Abu Sayyaf បានវាយប្រហារគ្នាយ៉ាងខ្លាំងនៅតំបន់ព្រៃស្ថិតនៅលើកោះ Jolo ខេត្ត Sulu និងវាយប្រហារមួយកន្លែងទៀតនៅកោះ Basilan ។
ទាហានហ្វីលីពីនបញ្ជាក់ទៀតថា មេឧទ្ទាម Abu Sayyaf ម្នាក់ឈ្មោះ Angah Ajid និងម្នាក់ទៀតឈ្មោះ Sarih Edris ត្រូវបានសម្លាប់ក្នុងការប្រយុទ្ធគ្នានេះ ។ ខាងកម្លាំងទាហានបានទទួលព័ត៌មានពីអ្នកភូមិ អំពីវត្តមានរបស់ក្រុមឧទ្ទាមនេះ ។
មេឧទ្ទាម Ajid នេះហើយ ជាមេឧទ្ទាមចុងក្រោយគេ ដែលត្រូវសម្លាប់ បន្ទាប់ពីចូលរួមក្នុងសកម្មភាពជាប់ជំរិតមនុស្សនៅតំបន់ Sipadan ឆ្នាំ២០០០ ។ កាលណោះ ក្រុមឧទ្ទាម Abu Sayyafបានចាប់ជំរិតមនុស្ស២១នាក់ ក្នុងនោះមានជនបរទេសមកពីអឺរ៉ុបផងដែរទាមទារប្រាក់លស់ ។
សូមបញ្ជាក់ថា ក្រុមឧទ្ទាម Abu Sayyaf បង្កើតឡើងក្នុងទសវត្សរ៍១៩៩០ ។ ក្រុមនេះល្បីល្បាញ់ពាសពេញពិភពលោកពីសកម្មភាពចាប់ជំរិតមនុស្សទាមទារប្រាក់លស់ និងកាត់ក្បាលជនរងគ្រោះដែលជាចំណាប់ខ្មាំងមិនរើសមុខ ។
រដ្ឋាភិបាលហ្វីលីពីន បានបង្កើតកងពលទាហានពិសេសមួយដើម្បីបោសសម្អាតក្រុមឧទ្ទាម នៅតំបន់ភាគខាងត្បូងមួយនេះ ។ កាលពីថ្ងៃទី២៧ ខែមករា កន្លងទៅ ក្រុមឧទ្ទាម Abu Sayyafនេះឯងហើយ ដែលបានវាយប្រហារគ្រាប់បែក២គ្រាប់ នៅព្រះវិហារសាសនា ក្នុងតំបន់ Jolo ខេត្តSulu សម្លាប់មនុស្ស២៣នាក់ និងជាង១០០នាក់រងរបួស ៕
