សារព័ត៌មាន នគរវត្ត តែងតែនាំមុខគេជានិច្ច
ភ្លៀងធ្លាក់ខ្លាំង បង្កជាគ្រោះទឹកជំនន់ វាយប្រហារតំបន់ជាច្រើនក្នុងប្រទេសឥណ្ឌា ប៉ះពាល់យ៉ាងខ្លាំងដល់ជីវភាពរស់នៅរបស់ពលរដ្ឋ ។ មកទល់ពេលនេះ មានមនុស្ស៣នាក់បានស្លាប់ និងរបួសច្រើន ក្រៅពីនេះនៅមានពលរដ្ឋ៤សែននាក់ត្រូវជាប់គាំង ដោយសារតែផ្លូវថ្នល់ត្រូវកាត់ផ្តាច់ដោយទឹកជំនន់ ។
មន្ត្រីឥណ្ឌា បានបញ្ជាក់ប្រាប់ប្រភពព័ត៌មានក្នុងស្រុក កាលពីថ្ងៃទី១១ ខែកក្កដា ឆ្នាំ២០១៩ថា គ្រោះទឹកជំនន់ នៅក្នុងរដូវវស្សានេះ បានវាយប្រហារទៅលើតំបន់មួយចំនួន នៅភាគខាងជើង និងភាគខាងកើត នៃរដ្ឋ Assam ប្រទេសឥណ្ឌា បានសម្លាប់មនុស្សចំនួន៣នាក់ និងជាង៤សែននាក់ផ្សេងទៀត កំពុងជាប់នៅទីនោះ ។
មន្ត្រីអាជ្ញាធរគ្រប់គ្រងគ្រោះមហន្តរាយរដ្ឋ Assam (ASDMA) បានបញ្ជាក់ថា «សរុបមនុស្ស៣នាក់ ក្នុងនោះ២នាក់ ស្លាប់ដោយសារលិចទឹក និងបាក់ដីមកទល់ពេលនេះនៅរដ្ឋ Assam» ។ ភូមិជាង២៥០ ត្រូវបានលិចទឹកមិនដល់២៤ម៉ោងផង ។ ផ្ទៃដី និងដំណាំកសិកម្មប្រហែល ១៦,៣៧០ហិកតាត្រូវទឹកលិចលង់ ។
ជំនន់ទឹកភ្លៀងកើតឡើងជាប្រចាំនៅក្នុងតំបន់នេះ ឲ្យតែរដូវវស្សាចូលមកដល់ ។ កាលពីសប្តាហ៍មុនទឹកជំនន់ក្នុងតំបន់បណ្តាលឲ្យជាប់គាំងដំណើរចរាចរណ៍នៅតាមដងផ្លូវមួយចំនួនក្នុងទីក្រុងម៉ុមបៃ ផ្លូវរថភ្លើង និងអាកាសយានដ្ឋានផងដែរ ត្រូវផ្អាក ដោយសារតែបញ្ហាជំនន់ទឹកភ្លៀង ៕
